La Usc di Ladins

"Finalmënter podunse indô baié da daurí" Chëstes les prömes parores de Andy Varallo, presidënt de Dolomiti Superski, tratan la conferënza stampa tignida chësta jöbia a Milan, por informé le monn dla stampa sön le pié ia dla sajun da d’invern. An sá che i pröms comprensors ó bele daurí ai 27 de novëmber, y spo por l’Edema do dess jí en funziun dötes les arees dl Dolomiti Superski – sambëgn sce la situaziun y ince le tëmp le conzed.

Chësta é na sajun da d’invern che á metü le Dolomiti Superski dan da desfides nöies, cis por les mosöres de precauziun che al orará ester. "La desfida che nes aspeta é suradöt liada al control dl schipas, ala segurëza por nüsc utënc", á dit Varallo, che á en chësc cunt ince dé na resposta ala domanda de co che an jará cun i schi, y dantadöt co che al gnará controlé le green pass; chësc ê bëgn le nojel plü rî da desgropé. Varallo: "Le Decret dl Presidënt dl Consëi di Ministri mët dant le control di utënc vigni de. La normativa prevëiga le greenpass por lift stlüc, deperpo che al n’ó nia ester por lifc daverc."

N sistem automatich por controlé le green pass
Ince valgamia brau, á Varallo podü incundé tla conferënza stampa a Milan le sistem nü y unich che Dolomiti Superski á lauré fora deboriada cun i garanc dla privacy y dites spezialisades. Ara se trata de n sistem de control automatich dl green pass, che ê rodunt incö ciamó sot l’ejam dl garant dla privacy por ciafé l’aprovaziun definitiva.
Al funzionëia insciö: le schiadú podará cumpré le schipas normalmënter ti ofizi o online (zënza messëi mostré le green pass). Le de che al jará cun i schi, arál denant da jí tla seziun Mydolomiti, se loghé ite y dé ite la ID dl schipas, che é nominativa. Le sistem fajará spo n control incrujé danter schipas y la app dl pass vërt, che dará fora le resultat sce al é döt apost o manco. Do chësc control ne messará le schiadú plü fá degügn controi sön pista, al podará jí döt le de zënza messëi mostré le pass pro vigni implant. Chësc sambëgn adinfora di controi a campiun che les forzes dl ordinn pó fá te vigni momënt. La prozedöra é spo da fá vigni de danü.

Y sce la sajun vëgn indô architada
Varallo á inant baié ince dla pert comerziala, plü avisa dles garanzies. La jënt cun schipas sajonal che â messü stlü ia la sajun bele de merz 2020 por gauja dla pandemia, ciafará n sconto dl 10% sön le schipas sajonal da iniann.
Y sce al foss ince iniann interuziuns? "Por chësta eventualité á Dolomiti Superski metü en pe n sistem de dërc de retüda por i utënc, che vá aladô dla situaziun." Danter les novités da iniann él ince la poscibilité da cumpré na cherta cun i "Super Days", che vá da n minim de 8 cina a n mascim de 40 dis. Chësta pón anuzé co che an ó tratan l’invern. Sce al foss spo interuziuns por le Covid, che l’utënt ne sciafia nia da adoré sö düc i dis, gnará chisc trasferis ala sajun che vëgn.

Por ci che reverda i implanc portamunt, orarál ester le mascherot, mo danter les informaziuns che fala ciamó, toca chëra sön la portada conzedüda, tan co la porcentuala de jënt che podará te cabina o sön scagn.  (pablo)