La Usc di Ladins

Per endrez del Servije Sozièl del Comun General de Fascia con sia Conseiera de Procura Mirella Florian l é stat domanà la colaborazion de desvalives enc, sociazions e copratives de Fascia per slarièr fora la consaputa de la comunanza sun chest tem. 
La pruma azion é en program en jebia ai 24 al Cotura Cafè a les 6 domesdì: con la Scola de Fascia e Inout vegn portà dant la scomenzadives endrezèdes dai studenc di licees che con la professora Silvia Murer i à lurà col teater sun esperienzes reèles de violenza sopida da la eles, i à fat enrescides su la situazion tel mond e en particolèr tel Afghanistan, i à enjignà na esposizion de fotografies e n costionèr su la percezion de la situazion de discriminazion anter ic e eles e sul lengaz sessist. Sarà n domesdì interatif per rejonèr de coche l é mudà la situazion de la eles con la pandemia, de la difujion del sexting anter i joegn e de co che se pel se tutelèr.
L CGF en colaborazion con l’Union di Ladins l à ence enjignà na lingia de biliec che vel dèr n messaje fort e che vegnarà dac fora e ence mané sui social e sui schermes al Fassa Coop e te la Copratives de val, che Florian vel rengrazièr per la bona colaborazion. 

Ence la sociazion La Voce delle Donne ai 25 de november, en colaborazion con i Comuns de Fascia e Fiem, la endreza na bela scomenzadiva de sensibilisazion, na sort de ona che desche n fil checen pearà via a Cianacei te Piaz Marconi da les 4 domesdì, con n flash mob con paroles e musega e l jirà inant ogne mesora, da les 16:30 dedant a la Ciasa de Comun a Sèn Jan, e dapò a Moena, a Pardac e a Tieser per ruèr en ultima da les 18:30 fora Ciavaleis. 

La sociazion, che per Fascia à desche referenta Ilaria Chiocchetti, é a la leta de duc i Comuns ence per ge dèr i ciuzé checegn.  (LG)