Se arvejina l moment de poder pontèr endò via con la sajon turistica e la memoria del invern passà, con duc i grieves problemes che la situazion sanitèra à portà ence te noscia val, é amò viva te duta la jent de Fascia.
L Comun General, adum con la aministrazions di Comuns e l’APT de val e con la Azienda Sanitèra provinzièla, l é cruzià ajache Fascia l é la val che à l numer de encalmé più bas che duta la provinzia e te la ultima setemènes ence te Fascia l é stat n smaorament del indesc de infezion al Covid-19.
Chest podessa meter a risech no demò la sanità de noscia jent, ma ence la sajon da d’invern e duta la l’economia de la val e del Trentin.
Per chest la istituzions fèsc apel a la responsabilità de ogneun per l ben de la comunanza e les envia duc a fèr l vazin.
Per dèr n didament concret sun chest troi se à moet ence la Provinzia de Trent, con l assessor Roberto Failoni e l conseier provinzièl Luca Guglielmi, e l é stat endrezà na dì per vazins aló dal distret sanitèr de Fascia a Sèn Jan, per ge dèr l met a duc chi che amò no i l à fat de poder se fèr encalmèr vejin a cèsa.
L servije é a la leta en sabeda ai 27 de november a scomenzèr da les 9 da doman. Per rejons de endrez vegn domanà de se enscinuèr chiaman l Distret al numer 0462 761000 o l Comun General de Fascia a 0462765400 o 0462 764297. (LG)
Fajé l vazin per no meter a risech la sajon!
La istituzions fèsc n apel a duc i fascegn: en sabeda ai 27 de november a Sèn Jan dì avert per la pruma dosa per duc.
Galaria retrac
View the embedded image gallery online at:
https://www.lausc.it/atualite/17872-faje-l-vazin-per-no-meter-a-risech-la-sajon#sigProId363f8e65c0
https://www.lausc.it/atualite/17872-faje-l-vazin-per-no-meter-a-risech-la-sajon#sigProId363f8e65c0