La Usc di Ladins

Tel Trentin l é n sistem de screening per i tumores al piet anter i miores a livel nazionèl e chest sistem troa fora vigni an zirca 160 caji positives ogne mile femenes che tol pèrt al screening.

L tumor al piet l é chel che più de spes taca la eles, l rua al 25-29% de duc i tumores e te la Tèlia n vegn troà fora vigni an passa 50.000 caji neves.

Chisc dac soscedea alarm e cruzie, ma da l’autra pèrt l é ence i dac che dèsc speranza, e che no é semper cognosciui. Defat l 48% de la jent peissa che de tumor al piet no se posse varir, enveze i studies ne disc che a 5 egn da na diagnosa de tumor al piet l 87% de la femenes é amò vives e l 80% les é amò en vita do 10 egn.

A fèr la desferenza l é la prevenzion e la diagnosa bonoriva, che permet de recognoscer l mèl per temp e donca de poder intervegnir sobito e n vegnir fora col dan mender. Ampò l 35% de la jent peissa che no sie possibol prevegnir l tumor.

Informèr l é l prum gran vèrech
Chesta situazion à spent la Conseiera de Procura del Comun General de Fascia Mirella Florian a se dèr jù con convinzion per la prevenzion del tumor al piet de la eles, do che con la campagna »Nastro rosa« tel meis de otober se aea encolorì de resa ence noscia val. Apontin tel meis passà la assessora Florian aea tout su la desponibilità del Servije de Screening Mamografich de Trent e del diretor de l’Unità Operativa Senologia Clinica dotor Marco Pellegrini per endrezèr na scontrèda te Fascia e ge fèr cognoscer miec a la femenes de noscia val chest emportant servije de la sanità, sia atività e si consees preziousc. 
En lunesc ai 22 de november la sala del Consei de Comun de Sèn Jan era belebon piena de femenes, a conferma de la emportanza del argoment. I saluc e i rengraziamenc é stac porté dantfora da Florian per l Comun general e desche patrona de cèsa per l Comun de Sèn Jan da la assessora Lucia Dellagiacoma, che la se à dit contenta de poder ge dèr alberch ai relatores sun n tem tant de valuta.
L é stat portà dant la atività de la LILT e se à podù scutèr i intervenc del dr Guido Piazza e del diretor de l’Unità Operativa Senologia Clinica de Trent, dr Marco Pellegrini.

De più su La usc stampèda de vender ai 26 de november.  (Lucia Gross)