La Usc di Ladins

I é 27 i maestres de schi del Trentin premié chest an da l’AMST, la sociazion che regoi duc i maestres de schi del Trentin. L tradizionèl moment ofizièl de scomenz de sajon é stat endrezà al PalaLevico Valsugana Fiere en sabeda ai 13 de november a chel che à tout pèrt l assessor provinzièl al turism Roberto Failoni, l president de l’AMSI Maurizio Bonelli, l president de l’AMST Alberto Kostner e i diretores de la scoles de duta la provinzia. Te chesta ocajion l é stat ence la litazion del nef president de la sociazion del Trentin te la persona de Andrea Sini che tol l post de Alberto Kostner, diretor de la scola de schi de Moena e ades ence ombolt del paisc, che no se à più metù a la leta desche president. Kostner resta tel diretif ensema a Luciano Fosco de la scola de schi de Cianacei.
Do i descorsc ofizièi l é stat l moment de la premiazion che la vegn fata ogne an per chi che à 30 egn de iscrizion a l’AMSI. A ciapèr l fioch de cristal l é stat ence n grop de maestres de schi de Fascia.

De più su La Usc stampèda de vender ai 26 de november.  (Monica Cigolla)