La Usc di Ladins

Tröc é i scolars y les scolares, dai 12 agn insö, che n'á nia ciamó fat la variora y/o che n'á nia albü le Covid y pó mostré sö de ester varis dala infeziun. Por chisc ne fossel nia plü sté poscibl da jí a scora cun la coriera, sce al foss jü en forza la lege che obliëia da respeté la regola 2G (variora o varijiujn dal virus, ndr) por jí cun i mesi de trasport publich scolastich. En domënia, ai 9 de jená, á le Minister dla Sanité, Roberto Speranza, firmé n decret che sbürla chësta lege de n mëis; lege che jará en forza cun i 10 de forá. Le decret nazional é gnü surantut dala Provinzia da Balsan cun na ordinanza firmada dal Presidënt Arno Kompatscher. Insciö messará i scolars y les scolares respeté inant la regola 3G por jí y gní da scora cun le bus y se vistí – sciöche al é preodü sön düc i mesi de trasport urbans y extraurbans – le mascherot FFP2. »Por la gran pert di studënc y dles studëntes dai 12 agn insö ne fossel nia sté poscibl da se lascé fá la variora anter i 10 de jená y respeté insciö la regola dl 2G. Insciö á les families ciamó n pü' de tëmp por se organisé«, á dit l'assessur provinzial ala mobilité Daniel Alfreider.  (Comunicat stampa dla Provinzia da Balsan/kp)