La Usc di Ladins

L’Ofize de Statistica Provinzial ASTAT fej vigni diesc agn la cum­ pedada di grups linguistics, tres chëra che an inrësc plü avisa tan sterch che vigni grup linguistich tla provinzia de Balsan é. Dit damperfora: ara ne se trata nia dla detlaraziun individuala che vigni porsona fej por podëi tó pert a concursc publics cun posć resservá aladô dl lingaz; ara se trata dla detlaraziun anonima, che é spo de basa por deplü ciamps: ara vëgn tuta ca por la composiziun di organns istituzionai de Regiun, Provinzia y Comuns, spo por la destribuziun di posć de laur publics y nia inultima ince por partí sö i finanziamënc publics che vá da scora, cultura, jonëza y tan d’ater. La cumpedada é porchël n stromënt important por vigni grup de lingaz, mo ciamó n iade deplü por i Ladins, che é bele insciö püc y che é destiná da gní en porcënt tres demanco, crësc pö i gragn grups cotan plü snel.
La cumpedada de chësc iade gnará fata anter döes fases. Te na pröma fasa de za. dui mëisc pó la jënt se fá instëssa la detlaraziun online, te na secunda fasa de feter trëi mëisc él preodü che les porsones inciariades aposta vais da ciasa a ciasa a ti condüje le formular a chi che ne l’á nia ciamó dé jö. L’ASTAT â pordërt preodü da pié ia al 1. de jená 2022 cun la fasa online, por jí inant spo de merz cun chëra sön papier. Püc dis dan Nadé él indere gnü le »dietro front« da pert dl istitut. La cumpedada é gnüda sburlada por plü rajuns: un n iade por gauja dla situaziun tres ciamó zitia cun la pandemia, olache al ne foss bëgn nia sté ideal da jí fora por les ciases. L’ater é spo n problem tecnich nia da püch cun la relevaziun online, che atoca ince l’argomënt zîte dla privacy.
I Ladins s’arjigna intratan ala cumpedada cun n portal d’informaziun online www.cumpedada2022.it olache an pó ince se scrí ite ala newsletter.

Deplü podëise lí t’La Usc di Ladins di 14 de jená














 (pablo)