La Usc di Ladins

Ester n’él nia n tier che an ciafa vignidé. En mercui sëra ai 19 de jená él gnü ciafé n lu mort sön ur dla strada che liëia Mühlbach y le stradun de Puster. Al ê gnü odü da n ciafêr che passâ de chi versc. Sciöche l’Ofize Ciacia y Pëscia scri te n comunicat, se tratera de n mandl jonn de za. 2 agn, che pësa 38,4 chili. Le tier mort é gnü condüt tla sënta dl Ofize, olache i tecnics á fat les mosoraziuns preodüdes. Incö vëgn le tier trasferí tl Istitut zooprofilatich por i azertamënc sanitars. Proes gnará ince menades ala Fondaziun "Edmund Mach" de San Michele all’Adige por azertamënc genetics. Insciö ón capí sce ara se trata de n lu che s’á destaché da n tlap de Südtirol, o sce al gnô da d’atri tlaps tl raiun dles Alpes. L’assessur provinzial Schuler sotrissëia che "al vá debojëgn da intervení por podëi apliché les mosöres de gestiun en cunt di gragn predaturs - lus y laurs. I laurun inant sön vigni frunt por arjunje chësc obietif."  (pablo)