Dì de la memoria: per no desmentièr

Data

24 de jené 2022

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Ai 27 de jené vegn recordà la gran tragedia del olocaust. Scomenzadives de la Provinzia de Trent e te Fascia per no desmentièr.


L dì de la memoria l é na data che del 2005 l’Assemblea generèla del ONU à dezidù de dedichèr a la recordanza de la vitimes del olocaust, o amò miec fossa dir de la Shoah, parola che per ebraich vel dir destruzion, dessatament.  

Fèr cognoscer e entener la gran tragedia e l oror che te la Germania nazista à portà al genocidie di ebrees, ma ence a la condana de n muie de etres, desche zinghegn, persones con desabilità o malaties psichiches, de color o con preferenzes sessuèles desferentes, l é n doer che doventa semper più emportant te nesc tempes che veit crescer te ogne setor i »negazionisć«  

Ence te nosc raion, pur con la limitazions per l Covid, vegn endrezà desvalives evenc, ouc a duta la comunanza ma en particolèr ai joegn. 

Tel dut l Trentin vegn spilenà »A ciascuno il suo – Jedem das Seine«, dal inom de la scrita sul ciancel de Buchenwald, na produzion del Club Armonia sostegnuda da la Provinzia Autonoma de Trent che é en program en mercol ai 2 de firé da les 20.30 al Palacongresc de Ciavaleis.

Te Fascia la Biblioteca de Cianacei met fora na esposizion de libres a tema e en jebia ai 27 de jené da les 18.30 vegnarà portà dant letures e testimonianzes da La ferata de la memoria en colaborazion con Inout.

Ence l Comun General de Fascia à volù fèr sia pèrt per endrez de la conseiera de procura Mirella Florian, con letures e testimonianzes sul tem portèdes dant da la assessores al sozièl de duta la val, enjignèdes con la colaborazion de l'Union di Ladins de Fascia, che vegn manèdes fora te duta la setemèna da Radio Studio Record.  (Lucia Gross)