La Usc di Ladins

Cun la cumpra de ot ferates nöies ó la Provinzia promöie na mobilité sigüda y nëta, motivé da adoré le sorvisc de trasport publich y renforzé la rëi de trasport publich tl Tirol dl Süd y sura i confins fora.
La lízita dl apalt bele dada fora odô danfora da cumpré dala sozieté Bombardier set ferates dla sort "Talent-3", ma che al é salté fora intardiamënc tla fornidöra di mesi te döta Europa y na situaziun nöia: la Bombardier s’á intratan metü adöm cun la fabrich de ferates franzeja Alstom. "Cun Alstom unse ciafé na soluziun nöia por cumpré les ferates, y por mirit di fonds ajuntifs dal Plann Nazional de Repreja y Resiliënza - PNRR, pó la Provincia sëgn cumpré ot ferates maius y plü comotes co les Talent-3", spliga l'assessur provinzial ala mobilité Daniel Alfreider.
Inier á la Junta provinziala inciarié la STA, de proprieté dla Provinzia, da porté inant la cumpra tres l’atualisaziun dl contrat bele sön mësa. Al gnará cumpré ot unités multiples dla sort "Coradia Stream" da Alstom, studiades y arjignades aposta por le trasport local.  (Iaco Rigo)