La Usc di Ladins

L é dal 2009 che te Fascia la pruma setemèna de mé é caraterisèda da na lingia de scomenzadives e ativitèdes per l’Aisciuda Ladina: l Festival del lengaz.

Chest event, metù a jir dal Comun general de Fascia con si Servijes linguistics adum con la Scola Ladina, l Istitut Cultural e l’Union di Ladins, l à tout ite ti egn duc i desvalives setores de la comunanza ladina, de Fascia ma ence de l’autra valèdes.
Chest an, do doi egn segné da la limitazions per l Covid, l’Aisciuda Ladina pel endò fiorir, no demò sui schermes ma ence dal vif. L slogan chierì fora chest’outa, che desche semper vegn portà dant da Bertol, la mascotte del event dessegnèda da Claus Soraperra e Manuel Riz, l é "Per tie davegnir ciatarul".

L argoment de chesta 14.a edizion l é apontin l teritorie, entenù desche teren per crescer, rich de oportunitèdes per duc. Se sà ben, la jent de Fascia la é semper stata leèda a sia identità e a sia tera: na tera rencurèda con amor da nesc veies, che à sapù maraveèr sacotenc foresć, e che ades la vegn ritèda da nesc joegn, che i met ju la semenzes per sie davegnir. 

Chesta Aisciuda Ladina la ne met dant desvaliva ativitèdes. De gra a chestes, aron l met de recordèr l passà de nosc raion, col descorir la storia de Fascia e si troes desmentié, e de viventèr l prejent, col se tor del temp per na raida sa mont, tegnan semper adiment la regoles de bona creanza. Dut chest, per enjignèr l davegnir, col ge dèr lèrga ai joegn e a si projec che à semper a cher l teritorie e l ambient.

Maor informazions e dut l program é da troèr te la piates de la manifestazions su La Usc stampèda de vender ai 29 de oril, o al link: https://www.aisciudaladina.it/.../Aisciuda_Ladina_2022.pdf

 (LG)