La Usc di Ladins

Do la fin ofiziala dla sajun 2022, ai 25 d’aurí 2022, é les vonüdes dl schipas por n de dl Dolomiti Superski resultades maius tla mosöra dl 19,3% respet al’ultima sajun ativa (al é le miú resultat dles ultimes 3 sajuns registrades), le skipass de 3 dis á registré n +18,7% (tresfora en aumënt respet ai ultimi agn de sorvisc). Le ciaval de trata dl Dolomiti Superski, le skipass de 6 dis, á indere pordü le 1,3% söla sajun 2019-20 y danter le 12 y le 20% söi inverns denant. Ince le numer de schipasc sajonai Dolomiti Superski vonüs é caré de püch plü co le 23,3%, ince sce chisc decremënc di abonamënc a dorada lungia mëss gní interpretá tres la malsigurté che motivëia le ghest da opté por les alternatives "skipass a dis". Ciamó lapró él gnü ofrí ince d’atri produc alternatifs desco le "Superski Family" y la cherta nöia "Superdays", plü flessibles.
Ciamó val’ dat statistich: le de cun le maiú numer de passaji tratan la sajun invernala 2021-22 é sté le lönesc 28/02/22 cun 2,52 miliuns, le de cun le maiú numer de pröms ingresc é sté San Salvaster (31/12/2021) cun 168.800 schiadus sön pista dl raiun Dolomiti Superski.
Al é preodü da daurí ai 21 de ma 2022 ofizialmënter la sajun nöia de Dolomiti Supersummer, cun 120 implanc portamunt en funziun tles vals dolomitiches d’isté y d’altonn.  (Iaco Rigo)