La Usc di Ladins

Bele dal ann 2007 incá él te Südtirol le proiet "Bookstart – ai pici ti plejel i libri" che á le fin da descedé bele da pici insö l’interes ai libri y la ligrëza da lí y da lí dant. Al é na iniziativa dla Agenzia por les families y dles Repartiziuns por la cultura todëscia y taliana che mira ala promoziun dla letöra por viadus y pici cina ai trëi agn. Cun le tëmp s’ára svilupé tres deplü: i geniturs che anunziëia sü pici tl ofize anagrafich de so Comun ciafa debann le pachet cun les informaziuns "Bëgnodü pice / Bëgnodüda picera" y i pröms dui libri de Bookstart. Le secundo pachet de libri por pici cun dui librins lapró pón spo jí a se tó te na biblioteca publica, canche le pice o la picera á 18 mëisc. Te intrami i pachec de libri él da ciafé dlungia a informaziuns en cunt dl lí dant ince n liber ilustré por todësch y por talian.
Dal mëteman dl ann 2021 ciafa les families che vir tles valades ladines n terzo liber por ladin ti dui idioms de valada scinché lapró. Por amplié l’oferta él gnü fat la traduziun dl liber "Mein erstes Wörterbuch" tl ladin dla Val Badia y tl ladin gherdëna en colaboraziun danter l’Agenzia dla Provinzia y l’Uniun di Ladins. Porater sarál tl dagní la poscibilité por düc chi che á interes da damané tres so Comun de residënza da ciafé le liber por pici por ladin, ince sce süa residënza n’é nia tles valades ladines. Chësc podess ester dantadöt interessant por zitadins y zitadines de lingaz ladin che ne vir nia ti Comuns dles valades ladines (Corvara, Badia, Mareo, San Martin de Tor, La Val, Santa Cristina, Urtijëi y Sëlva), por porté sü pici che crësc te n contest de lingaz todësch y talian pormez al lingaz ladin.
Sön na plata web aposta dla Provinzia (https://www.provinz.bz.it/familie-soziales-gemeinschaft/familie/bookstart-libri-ladins.asp) él da ciafé deplü consëis en cunt de libri por ladin por pici leturs y leturies, che vëgn dal Istitut Ladin Micurá de Rü. Deplü informaziuns sön l’iniziativa "Bookstart – ai pici ti plejel i libri" sciöche ince sön consëis nüs vigni mëis en cunt de libri por pici leturs y piceres leturies él da ciafé online sot a www.provinz.bz.it/bookstart. Libri da se impresté fora por pici y gragn él sambëgn da ciafé tles biblioteches de tröc posć te Südtirol o ince sot a https://biblio.bz.it/.