Antone Pollam, papabel per la presidenza dla Union Generela

Data

19 de mei 2022

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Tla reunion dl Consei dla UGLD-Union Generela di Ladins dla Dolomites enseira (ai 18 de mei  2022) a Urtijei s’à prejenté ofizialmenter l president onorar dla Union di Ladins de Fascia Antone Pollam sciche candidat. Sia man dreta tl diretif nuef sarà la presidenta atuala dla Union Generela Milva Mussner
Milva Mussner é da 7 agn encà presidenta dla Union Generela di Ladins dla Dolomites, la lia tet dles Unions di Ladins dles valedes entourn l Sela y soula organisazion culturala interladina. A ela ti vàl n gran rengraziament per la dedizion, seriosité, competenza y responsabelté che ala à desmostré y metù en at a ben dla UGLD y dla Ladinité, y ence per la desponibelté che ala à anunzié da dé ca inant sciche vizepresidenta dl sourastant eventual Antone Pollam. I agn passés n’é nia stés saurisc per la cultura y la coejion soziala ti paisc ladins, dantaldut nia i ultims doi con les restrizions interpersonales; empò à la Union Generela metù en pe manifestazions culturales y ativités publizistiches, y dantaldut dé fora con coscienza y responsabelté "La Usc di Ladins", che à podù vegnì meneda edema per edema zenza paussa fora per les ciases ladines. Milva Mussner se dedicarà tl diretif nuef in primis a l’aministrazion y a l’economia dla union, te chela che la impresa y l projet "La Usc di Ladins" tol ite na pert importanta.
Antone Pollam é nasciù de november dl 1952 a Vich te Fascia. Al é dotour di mutons (en pension) y president onorar dla Union di Ladins de Fascia. Al é sté per cotanc de agn president dla Union di Ladins de Fascia y ence president dl Istitut Ladin "Majon di Fascegn". Anter d’autres enciaries de relevanza soziala y culturala desfiredes él da auzé fora sia presidenza tl Rotary Club de Flem y Fascia.
En vender, ai 27 de mei 2022, domesdì, saral la reunion anuala dla Union Generela di Ladins dla Dolomites, olache al vegnirà aprové l bilanz consuntif 2021 dla UGLD y d’La Usc di Ladins, y ence lité l:a president:a nuef:va y dut l diretif.  (Iaco Rigo)