Ferata de la Veisc, dai ensomesc a la realtà

Data

22 de mei 2022

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L president de Transdolomites Massimo Girardi l é otimist. L percors che mena al studie de fatibilità se à envià via.


Do egn de convegnes e proponetes sul argoment de la ferata, se mevel valch?

L convegn che aon endrezà de otober del an passà e chel che aon fat de oril de chest an, duc doi al Muse de Trent, ne à dat l met de aer n cader amò più chiar de che che se à moet te chisc ultimes egn a livel alpin. Tel convegn del an passà aon tratà l argoment de la ferata en funzion turistica donca no demò coche la vegnarà fata e olache la passarà, ma ence l moviment economich che n investiment coscita pel meter sul teritorie. La funzion turistica de la ferata, leada ence a na oferta de cultura, rejonon per ejempie di treni storics, l é n element che ciapa semper più gaissa a livel talian e european. L é stat fat ence na lege per enviar via endodanef le ferate storiche che era state serade su o desmetude do la seconda vera. Valguna de cheste le à n fondament demò turistich, autre enveze le pel esser endò metude en esser desche meso de trasport local. 

Apede chest l é da conscidrar ence l aspet economich, i finanziamenc che vegn metù a la leta, che é semper maores. Se l PNRR à metù a la leta sui 270 miliarc de euro, l Goern de Draghi n à metù passa 55 miliarc per le ferate de trasport regional e ferate turistiche, donca no demò auta velozità. Amò apede la Comiscion europeana col Green Deal à investì su la ferata desche element de mobilità del davegnir e, de gran enteress per chi che laora col turism, l é l’Agenda Europeana del turism 2030/2050 con chela che se mira a endrezar l’Union Europea desche destinazion del turism a livel mondial. 

De più su La Usc stampèda de vender ai 20 de mé.

 (Monica Cigolla)