La Usc di Ladins

Dal prum domesdì de chesta domenia ai 3 de messèl te Fascia l é n jir e vegnir do e do de ambulanzes e mesi de socors e de protezion zivila, con ence 5 jolieres.

L gran azident é sozedù anché tel prum domesdì sun Marmolèda, olache per l gran ciaut se à destacà n coston de giacia.

L alarm é stat dat da trei chèrts da la does domesdì, da n menacrep che era vejin e l à vedù dut. L destach imprescionant de giacia vejin a Ponta Rocia é stat ence tout ju te n video amatorièl da Chel Vesco.

Sul post l era n muie de jent che vegnia de retorn da la raida sul giacé, la pruma informazions rejonèa de presciapech 15 persones ciapèdes ite, somea ence doi cordèdes de rampinadores, ma per i socoridores no l é amò l temp de la comunicazions e de la analises: endèna l é amò da se dèr da fèr, destrametui e zenza rechia, a chierir, ence col didament di cians da levina, de chi che l é chi toc che vegn fora: n ciuzé, n prossach, na pica, o aderutra n toch de corp.

Chesta no l é na levina de neif desche cheles che cognoscion da d’invern – à dit n socoridor – l é n gran coston de giacia, toc gregn desche auti e se l é zachei sot ite no joa a nia jir con sondes... no resta nia...  

I socorsc i à tout ite volontères da Fascia e da duc i raions vejins e i jirà inant al lonch, segur no i fenirà anché. Endèna a Cianacei l é stat ativà na postazion sanitèra arvanzèda de emergenza e se spera dassen che l bilanz finèl no l sie scì pesoch descheche fèsc pissèr chesta pruma ores.

 (Lucia Gross)