La Usc di Ladins

Tla terza tlasses dla scoles mesanes ladines fovel chëst ann 234 sculées y sculeies, duc ie unii lascei pro al ejam finel. Per ti unì ancontra ala sculées y ai sculeies do n ann de scola mo caraterisà dala pandemia, fovel chëst ann 3 proes scrites y n ejam a usc tla scoles ladines. Duta la sculées y duc i sculeies ie stac boni de passé l ejam de cuntlujion dla scola mesana y possa nsci se goder la feries da d‘instà. 6 sculées y sculeies à giapà la valutazion plu auta "diesc cun lauda", 15 la valutazion de "diesc". 56 sculées y sculeies ie passei cun na valutazion de "nuef", 82 cun "ot" y 46 cun "set". Ndut iel 29 che à stlut ju la scola mesana cun "sies".
Sudesfazion nce da pert dl assessëur Daniel Alfreider che sotrissea l mpëni dla scoles per arjonjer de bon resultac tl mparé y tl nseniamënt n presënza. "A duc i sculeies y ala sculées ti mbinci śën n bel instà per pudëi paussé y se njenië ca al proscimo var tla furmazion che i/les se à cris ora".
Auzà ora vëniel da pert dla Intendënza ladina la bona preparazion linguistica y la capazità de purté dant l lëur che ie unì prejentà dal ejam a usc. "N vëiga che la digitalisazion à purtà si fruc nce tla forma de prejenté n lëur te na maniera digitela", sotrissea l’intendënta Edith Ploner che deberieda cun l ispetëur Albert Videsott à usservà de plu ejams a usc.
Duta la cumiscions à pudù stlù ju regularmënter i ejams zënza problems de malaties che ëss tenì su l finé via di ejams.
N generel fovel ntan chëst ann de scola 2021/22 672 sculées y sculeies tla scoles mesanes ladines, 669 (l 99,55%) de chisc ie passei ala tlas dla scola mesana plu auta o ala prima tlas dla scola auta. 3 ne ie nia passei ala tlas do.