La Usc di Ladins

La é do a jir pian pian de retorn envers la normalità la situazion te Fascia, de gra al gran lurier che da angern domesdì à empegnà i Studafech de duta la val, l socors, la aministrazions de Sèn Jan e Mazin e volontères e duc i setores de la Protezion zivila del Trentin. A ic va l develpai gran de sentadins e ghesć.

Amò ansera l é stat endrezà l passaje per arsegurèr l coleament te val a Mazin e Fontanac, duran ence l troi per la rodes e va inant l lurier per poder orir deldut la strèda.

Te la ultima ores la perizies tecniches ge à permetù ai operatores de la protezion zivila trentina de fèr jir de retorn te sia majons na pèrt de la persones tel Comun de Sèn Jan che per segureza les aea cognù se n jir da cèsa e passèr la net te la casermes e strutures enjignèdes dai volontadives.

L é a Poza l maor grop, presciapech 150 persones, che à cognù librèr cartieres e vèlch hotel per desvalives ponc de smolinament da la man de Sorapoza. Ence a Pera e a Vich l é situazions pech staboles che vegn tegnudes sot contol da geologs e esperc, endèna dai dac de la Protezion zivila de anché bonora l é amò na cèsa a Pera olache 5 persones no pel ite e a Vich na ventina de persones speta l’autorisazion a jir de retorn.

No resulta che nesciugn sie stat arlontanà da sia majon a Ciampedel e Mazin, olache i studafech i é amò do a lurèr per librèr strèdes e garajes. Dut ensema la situazion é belebon chieta, l à lascià de piever e va inant l lurier per neteèr strèdes e cèses da la mauta.

Ence la Festa ta Mont moment emportant per tegnir ensema la comunanza e vardèr inant con speranza, é stata confermèda, ben segur racomanan a duc de recordèr che canche se va ta mont se cogn vardèr de esser atrezé aldò. 

 (Lucia Gross)