La Usc di Ladins

A 10 egn da la pruma edizion, con la neva direzion artistica de Pierangelo Giacomuzzi, l é stat portà vèlch mudament e chest an l Simposie portarà èrt e sons te piaz: no sarà più demò scultura, ma l metarà ensema l’èrt visuèla e la musega. Artisć del legn e artisć del son lurarà ensema, en cobia, per realisèr sot i eies del publich strumenc che se podarà sentir sonèr te na jam session con de etres sonadores a la fin de la manifestazion.

Fèr èrt, defat, vel dir sperimentèr e n simposie l é l’ocajion miora per fèr sperimentazion travers l barat de idees, conzec, strumenc, materièi, de tecniches; l é na vida per evolver, con autra paroles na vida per crescer.

L tem cernù l é »Surplus – de massa«: te chest temp che sion duc cercené da fausc besegnes la scultura ne moscia che la operes vegn fora dal legn tolan demez chel che l é ‘de massa’ e che se pel realisèr a na vida scempia ence con elemenc recuperé strumenc che pel dèr efec enteressanc e soscedèr emozions.  

Tolarà pèrt 4 cobies: l badiot Max Castlunger con Arianna Gasperina; Markus Gasser con Gianluigi Zeni; ‘Kompripiotr’ col badiot Tobias Tavella e Giorgia Marchetti con Guglielmo Bevilacqua.

No menciarà l laboratorie didatich de scultura di studenc del Liceo artistich de Fascia che i podarà se sproèr a zipièr (ic con la tecniches tradizionèles) dedant a la jent col didament di ensegnanc Davide Deflorian, Andrea Dorigatti e Tiziano Deflorian.

I artisć lurarà dal lunesc al vender te 4 postazions a l’averta e ogne dì les 18:15 da vegnarà endrezà n event de cornisc, te piaz o te sala de Comun. Ai 12 sarà la prejentazion di partezipanc e del Simposie; ai 13 n Aperiart con musega e ciacolèda con artisć e artistes lo dal Pub Mirò; ai 14 na scontrèda sui maestres del passà (Bepin Soraperra, Tita Pederiva, Zerilo Bora e Toni Gross); ai 15 Aperiart lo dal Pub Rew e ai 16 da les 17.30 performance finèla.  (LG)