La Usc di Ladins

Do la pruma esperienza positiva del projet »AtivaMent«, peèda via del 2019 ti teritories de Fiem e  Fascia per la promozion de scomenzadives de sensibilisazion su l’Alzheimer e la demenzes en generèl, te chest meis de setember, meis mondièl del Alzheimer, va inant de autra scomenzadives de gra a l’azion sinergica de desvaliva istituzions e sociazions: la Comunità de Fiem, l Comun General de Fascia con si servijes sozio assiztenzièi e la responsabola Paola Rasom, i Distrec sanitères APSS de la doi valèdes, chel de Fascia con la caposala Lucia Dellagiacoma, l Ambulatorie CDCD de Ciavaleis e amò la sociazions Rencureme con la presidenta Annalisa Zorzi e Il Sollievo con la referenza Milena Vanzo.

L obietif semper più urgent te nosc temp l é chel de meter a jir prateghes che posse didèr a jir envers l ’età maora de la vita con consaputa e serenità. Per chest dai 29 de setember al prum de otober l é en program l convegn AtivaMent te Fiem e Fascia, che met dant i desvalives aspec che caraterisea l problem de la demenzes, i comportamenc adaté e la respostes che pel vegnir arsegurèdes te nosc raion.

L projet à n moment de coinvolgiment con la popolazion en mercol ai 21 de setember col spetacol "Vago Oltre" de Loredana Cont te teater a Pardac e dapò ai 30 de setember te Comun de Moena da les 16:00 sarà la scontrèda co la d.res Simona Gardini e Martina Cavada e da les 20:30 n laboratorie col architet Alessandro Franceschini. Al prum de otober da les 14:00 inant la scomenzadives sarà al Zenter del saut Stalimen de Pardac.  (lg)