La Usc di Ladins

Da un a trei dut te n colp. Rejonon de sfoes da ogne dì. Se per n an entriech i letores de la provinzia de Trent à cognù se encontentèr de un soul sfoi, L’Adige, ades sun desch i podarà n aer adertura trei. Coi 3 de november defat, te la boteighes sarà ence ‘il T’, l nef sfoi autonom del Trentin-Sudtirol.

Se trata de n projet editorial sostegnù da la fondazion Synthesis, n ent no profit nasciù de oril dai promotores Confindustria Trent e Cooperazion Trentin ensema a la Sociazion de Hotelieres e de Artejegn e ATE-ANCE Trent, con na ventina de etres sozi sostegnidores e ordenares. Na endesfida touta su con coraje dai imprenditores de noscia provinzia, mencia Confcommercio con sie president Giovanni Bort che fèsc pèrt del Consei de aministrazion de L’Adige. La fondazion à metù su na sozietà col medemo inom, e apontin la sozietà Synthesis é editora de ‘il T’.

N nef spazie de informazion locala donca che vel soraldut restabelir l prinzipie fondamentèl del pluralism, soraldut do che de jené del 2021 l é stat serà su fora de n bel seren la redazion del sfoi Trentino lascian zenza lurier giornalisć e redatores. L an passà l patron Michl Ebner dijea che no l ge stajea ite coi conc, ma canche l à sapù che fossa vegnù fora endodanef n nef sfoi concorenzial, te na prescia l à metù ensema ‘Il Nuovo Trentino’, n sfoi extraslim de 12 piates che costa demò 1 euro. Con coluna strategia? Se fèsc prest a la entener.

»No l é l sfoi de la categories imprenditorièles, aon piena libertà de azion« ge à tegnù a sotlineèr l diretor responsabol Simone Casalini che chisc dis passé é jit te duta la valèdes del Trentin per prejentèr l projet editorièl. 

En vender ai 21 de otober dant a Moena te Ciasa de Comun e dapò a Ciavaleis te Biblioteca, l é ruà con trei giornalisć de la neva squadra: Gianfranco Piccoli capo servije e referent per la valèdes de Fascia e Fiem, Daniele Benfanti che se cruziarà del teritorie de la Valsugana fin al Primier e Francesca Dalrì che se cruziarà de ambient e l’arà l’encèria de corir la Val de Non. 

De più su La Usc stampèda de vender ai 28 de otober.

 (Monica Cigolla)