La Usc di Ladins

Do chësc bel otober, mët man le tëmp da mudé cira: aladô di meteorologs dla Provinzia röiel alerch de nöt na perturbaziun da süd, che portará plöies te döta la provinzia. La presciun bassa che vëgn dal süd incuntará n frunt frëit che vëgn da nord y chësc portará a n arbassamënt dl limo dla nëi, che podess rové jö cina 1.500 metri. Tla gran pert dla provinzia de Balsan s’aspeton danter 20 cina 40 litri d’ega por meter cuadrat, localmënter ince deplü.
Cun en doman vëndres s’aspeton tl Südtirol la pröma nëi: chi 5-10 cm podessel nen tomé sön le Prener y le Reschen, mo ince tl’alta Val de Puster podessel gní blanch. Le plü nëi s’aspeton sön le Timmelsjoch (vëgn stlüt incö dales 20:00 inant) y le Staller Sattel (vëgn bele stlüt incö dales 14:00 inant). L’invit é porchël da mëte averda sön strada, cis sön les strades plü alalt y di jus. "Chi che vá cun l’auto sön chëstes strades, dess a vigni moda avëi la dërta atrezadöra da d’invern", aconsiëia le diretur dl Zënter Funzional dla Provinzia (Landeswarnzentrum) Willigis Gallmetzer.
Le raport sön la situaziun vëgn publiché de por de y pó gní ciaré sön https://warnungen.provinz.bz.it/de/reports/risk-potential/map

 (pablo)