La Usc di Ladins

Aladô dles Naziuns Unides arjunj avisa incö la popolaziun mondiala la soma de 8 miliarg. Dl 1950 viôl söl monn ma n terzo dl numer dles porsones atualmënter.
Co jarara pa inant? La popolaziun mondiala ne cresciará inant aladô di esperc nia plü tan dassënn sciöche i ultimi agn, ajache l’aumënt do i agn dl 2000 é tomé sot la merscia dl 1%.
Impó rovará la popolaziun ciamó bunamënter a 10 miliarg de porsones, chësc, te chi 50 agn. Dedô dess le numer caré – aladô dla tendënza dles nasciüdes y morts dles porsones di agn plü ric de mituns.
Tla mesaria mondiala á vigni ëra metü al monn dl 2021 2,3 mituns. La eté mesana dles porsones crësc tresfora por le livel dla sanité y dl’alimentaziun che aumentëia.
Les desferënzies dla cualité de vita müda dër aladô dla regiun geografica, y i Statesc cun la maiú cualité de vita gnará tres plü dla meseria de mituns: dl 2050 sará le mez dl aumënt dla popolaziun da chirí ti ot Statesc India, Tansania, Filipines, Pachistan, Nigeria, Egit, Congo y Etiopia.
Le Stat cun le maiú numer de popolaziun é cun 1,4 miliarg la Cina, mo chësc numer cara ti agn che vëgn.
Important por la politica y sanité internazionala é chësc dat: te Europa é la eté mesana dles porsones pro 41,7 agn, ti Statesc africans a Süd dla Sahara ma pro 17,6 agn de vita.