La Usc di Ladins

Se tel Sudtirol chest’outa l é ruà adertura 26 steiles Michelin, tel Trentin n é ruà 8 e de chestes 2 te Fascia. I à confermà la steila i restoranc L Chimpl de Tamion del chef Stefano Ghetta e la Malga Panna de Moena del chef Paolo Donei. Apede a chisc doi chef fascegn n é n auter, Peter Brunel da Soraga con so restorant a Linfano de Arco, ence el l à confermà sia steila checena. 

La guida Michelin 2023, prejentèda enstadì te la Franciacorta, à premià amò apede con la steila verda de la sostegnibilità l Agritur El Mas de Moena col joen chef Stefano Croce che é ence stat recognosciù anter i Bib Gourmand (i restoranc olache se magna ben e se spen pech) ensema al Hotel Restorant Foresta. Con la steila verda l é ence l Restorant SanBrite de Cortina de Ampez che à ence na steila Michelin desche l Tivoli. Amò te la prestigiousa publicazion l é la segnalazion de la Malga Roncac a Moena e del Restorant El Filò a Poza. Donca na gran bela sodesfazion per Fascia e per sia ezelenza tel mond de la gastronomia. 

L orgolie amò maor rua te Fascia per l bel travert arjont da Paolo Donei che l à ciapà la steila per 30 egn a do a do. El, clasc 1973, l à ciapà la pruma steila Michelin che l aea demò 19 egn. L é ben segur n primat ajache tel mond l é ence etres chef che à ciapà n aut numer de steiles ma per restoranc desferenc. Paolo Donei à ciapà 30 steiles semper te sie restorant Malga Panna e chest dèsc l’idea de l’auta calità, de la ezelenza no demò ti piac ma ence tel servije, tel ambient e dut chel che ge roda dintorn. Nos sion jic a troèr Paolo te sie restorant per se fèr contèr i secrec de chest emportant travert.

Podede lejer dut su La Usc stampèda de vender ai 18 de november.


 (Monica Cigolla)