La Usc di Ladins

Cun messé dl 2021 á le »Sudeten­ deutsches Museum« da Minca ciafé n diretur ladin, Stefan Planker, ex diretur dl Museum Ladin. Da süa proposta nasc l’iniziativa che gnará as’aldéai2y3dedezëmberyche á sciöche fin le barat intercultural: i baiun di »Sudetendeutsche Dialoge: Conferënza tl Museum – dialogh anter les mendranzes y i grups etnics dl’Europa.« Pro chësc convëgn rovarál adöm esponënc de de plü mendranzes europeiches: sambëgn i Sudec Todësc che á a Minca ince so museum y la sënta dla Fondaziun, spo la mendranza di Todësc tla Republica Ceca, chëra di Sorbs tla Lusazia y nia inultima i Ladins dles Dolomites.
Tratan i dui dis él preodü referac, impulsc y discusciuns a 360 gra. Le program mët man le vëndres ai 2 de dezëmber cun le salüt y l’introdu­ ziun da pert dl dr. Ortfried Kotzian, por jí inant spo cun le dr. ph. Bernd Posselt, che baiará di Sudec Todësc. Atira dedô sarál Eva Haupt che vá ite plü avisa tl Museum di Sudec Todësc. Por ci che reverda i intervënc ladins, sarál le diretur dl Istitut Ladin »Micurá de Rü« dr. Leander Moroder che baiará di Ladins dles Dolomites sciöche na mendranza che se renforza. Atira dedô i gnarál passé la parora al dr. Stefan Planker, che cuntará dla »Contrada museala tla Ladinia«.
Tratan le de él spo preodü referac sön la mendranza todëscia dla Republica Ceca (Martin Dzingel) y la mendranza todëscia tla Cecoslovachia do le 1945 (Irene Novák). Peter Bresan baiará di Sorbs tla Lusazia y Christian Bogusz jará ite sön le Museum di Sorbs sciöche punt anter inier y incö. Le domisdé vá a piz cun vijites menades tres le Museum di Sudec Todësc, tignides por ladin y por todësch.

N de dediché ai media de mendranza

Le secundo de dl convëgn se conzen­ trëia sön i media de mendranza. Le danmisdé vëgn daurí da Torsten Fricke, che jará ite plü avisa tl laur dla »Sudetendeutsche Zeitung«. Dedô ciafa lerch i media ladins: impröma cun Pablo Palfrader, che tignará n referat d’impuls sön »La Usc di Ladins danter storia, presënt y desfides dl dagní«, y spo cun Mateo Taibon che baiará dles trasmisciuns ladines tla Rai, sot al tema »La gran chance dla visibilité«. I atri referac é de Cordula Ratajczak che baia dla contrada di media sorbs y Steffen Neumann che baiará dla stampa todëscia tla Republica Ceca. Le convëgn vá a piz cun na mësa torona dal titul »Mendranzes y grups etnics dl’Europa tl dialogh sön le laur dla stampa«. Le moderadú Fabian Riemen nen baiará cun Torsten Fricke, Mateo Taibon, Steffen Neumann y Cordula Ratajczak. L’entrada al convëgn é debann.