La Usc di Ladins

Che ala cojova bele da n pez anter la Ruscia y la Ucraina savova duc chi che ti stà empù do a la politica. Dl 2014 ava la Ruscia tout ite la penijola Crimea che l secreter dl partit comunist rus Nikita Crusciov ti ava dl 1964 sourandé a la Ucraina per rejons economiches y logistiches; l’Ucraina fova enlaouta un di plu de 20 stac satelic dla Union Sovietica. Sun chela ava atira i filorusc dla Ucraina declaré les regions dl est, Donezk y Luhansk, republiches independentes, ajache ai savova che la NATO ne essa fat nia, sciche al fova suzedù do l’anescion dla Crimea da pert dla Ruscia. Rodunt ilò essa la NATO (encuei fej pert 30 stac) messù se mueve y tò na dezijion sterscia, ajache Putin se tem demé da chi che mostra dezijion y forza. L’Europa ti ava fat a Putin massa giut les beles per fé de bogn afars empera, ma el ne ava profité per enjigné ca ermes plu stersces, pensavel pu bele da agn de ti arsí al col a la Ucraina. La NATO seghitava emplù a sotligné che ala n’essa nia mané saudés tla Ucraina sce l’armada ruscia essa ataché l’Ucraina. Plu saurida che enscì n’essen nia podù ti la fé a Putin; l cont paionse sen nos duc!

Demé na "Operazion speziala"? Lijede deplú t’La Usc di Ladins di 5 de jené 2022