Prestisc por le lingaz ladin

Data

09 de jené 2023

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La tecnologia moderna le pormët: te Gherdëna, te Fascia y tla Val Badia gnaral tosc incundé i posć de architada dles corieres ince por ladin. I inoms ladins gnará incundá ince por 5 staziuns dles ferates al’entrada dles valades ladines
I passajiers y les passajieres che rovará tles staziuns de Bornech, Bornech nord, San Laurënz, Pruca y Tlüses ne aldiará les incündes de architada nia ma por talian y todësch, mo ince por ladin. Y tosc aldiarunse te trëi lingac les incündes de architada dles corieres te Gherdëna, Val Badia y tla Val de Fascia.
"Tl dagní gnará i passajiers y les passajieres de südtirolmobilité informá ti trëi lingac dla Provinzia: todësch, talian y ladin" dij Daniel Alfreider, assessur provinzial ala mobilité. "I orun a chësta mainira dé n signal sterch al’adoranza dl lingaz ladin, y dé nosc contribut por le mantignimënt y la valorisaziun dl plü vedl di lingac de nosc raiun."
Les incündes por ladin é bele sëgn da aldí pro les 5 staziuns dla ferata. Pro les architades dla coriera tles valades ladines gnará le sistem lauré fora tles edemes che á da gní, y fora por i mëisc, sön dötes les corieres nöies che jará en sorvisc chësc ann.
La usc che incünda i inoms dles prësc 350 architades dla coriera y dles 5 staziuns é chëra de Maria Craffonara, che vëgn fora da na familia ladina che vir a Bornech y che baia badiot. Craffonara á danterater na formaziun da ciantarina, y se dá jö da deplü agn incá cun proiec musicai sura döta Europa – scrí la Provinzia da Balsan te n comunicat stampa.