La Usc di Ladins

Colun sarèl l davegnir per l ospedèl de Ciavaleis? La costion é jita inant fora per l an passà soraldut sui sfoes, do che l é vegnù al luster la proponeta de fèr na neva strutura en partenariat publich-privat a Masi de Ciavaleis enveze che restruturèr chel te paisc. Ades la discuscion someassa tachèr a jir più tel concret ence te la sentes che ge pervegn. 

En lunesc ai 9 de jené l president Maurizio Fugatti à scontrà l president de la Comunità de Fiem Giovanni Zanon e i ombolc de Fiem e en mèrtesc a chest argoment ge é stat dedicà n Consei Provinzièl straordenèr domanà da la mendranzes.

Ai 30 de jené fora Tieser sarà na scontrèda averta a duc i aministradores e conseieres di Comuns de Fiem, Fascia e Cembra e del Comun General a chela che, su domana di ombolc, tolarà pèrt tant la pèrt politica che chela tecnica de la Provinzia, ma ence referenc de l’Azienda Sanitèra del Trentin, per poder analisèr a la vida miora duc i aspec de la doi soluzions.

De più su La Usc stampèda de vender ai 20 de jené.  (Lucia Gross)