La Usc di Ladins

N muie de jent ence da Fascia à tout pèrt ai 13 de jené a la scontrèda tel Palaz de la Magnifica Comunità de Ciavaleis, olache l é stat envià Giorgio Postal e Karl Zeller, esponenc politics respetivamenter de la DC e de la SVP stac per n pez parlamentères a Roma, Postal dai egn ’60 per 6 legislatures e Zeller dal 1994 al 2018.

Con la moderazion del giornalist Alberto Faustini i é peé via da la storia. Postal à recordà l percors de ‘pazificazion’ anter Trent e Busan tacà al scomenz di egn ’60: na politica de confront con discuscions ence feruscoles te la Comiscions paritetiches, ma con n obietif chièr e condividù da ge meter dant al Goern. Sun chest se à pojà na sort de ‘costituente permanenta’ de l’autonomia, che ge à permetù a nosc teritorie ti ultimes 50 egn de crescer a na vida straordenèra.

Zeller à recordà sie scomenz con Alfons Benedikter e l obietif de sepolir la Region, ma col temp l à mudà idea e entenù che l chèder regionèl l é chel dret olache Trent e Busan, pur ogneuna con sia autonomia, les cogn se troèr adum su la costions emportantes e ensema con Dellai (che era prejent te la sala ma no l à mai tout la parola) l à podù ge dèr segnificat concret. 

De più su La Usc stampèda de vender ai 20 de jené.  (Lucia Gross)