Do la maraveousa paladina naturèla del Vera, l spetacol teatrèl »Do l vièl del saer – Lis dal Vera vel te dir vèlch« é stat prejentà en sabeda ai 14 de jené te chino Marmolèda de Cianacei e en domenia ai 15 te La Gran Ciasa a Soraga. L Istitut Cultural Ladin Majon di Fascegn à volù l portèr ence te paisc per ge dèr l met a duc de l cognoscer e l aprijièr. Coscita i atores de la compagnia »Trei carc de ora« se à endò trat te la pèrts de Lis e sia jent per contèr la storia de chesta femena, Elisabetta Salvador, che à vivù duta sia vita te noscia picola val, ge dajan valor a la robes scempies, ai valores de cèsa, familia, stala, ciamp e pra. Ilaria Chiocchetti, David Dorich, Ivano Favè e Letizia Pezzei col didament de Paola Costa à adatà l spetacol a la paladina e i à spilenà con braura e con sentiment, tant che ence chi che l aea jà vedù, se à endodanef emozionà.
L spetacol l é stat l’ocajion per prejentèr l nef libret dedicà belapontin a Lis dal Vera, l secondo de la regoeta »Jent de Fascia«, do da chel sun Père Frumenzio Ghetta de Martin.
De più su La Usc stampèda de vender ai 20 de jené. (Monica Cigolla)
Lis dal Vera, ejempie per gregn e picoi
L Istitut Cultural Ladin à portà sun paladina de Cianacei e Soraga l spetacol teatrèl e prejentà l nef libret de la regoeta »Jent de Fascia«.
Galaria retrac
View the embedded image gallery online at:
https://www.lausc.it/atualite/22303-lis-dal-vera-ejempie-per-gregn-e-picoi#sigProId45b5bc9f8b
https://www.lausc.it/atualite/22303-lis-dal-vera-ejempie-per-gregn-e-picoi#sigProId45b5bc9f8b