Sorvisc zivil: ince indô iniann 370 posć

Data

31 de jené 2023

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La Junta provinziala da Balsan á aproé le plann di sorvisc zivii por le 2023. Ince en chësc ann él indô a desposiziun 150 posć tl sorvisc zivil provinzial, 100 tl sorvisc sozial provinzial y 120 por ativités acompagnatores ales vacanzes dla jonëza
Jogn y manco jogn á ince tl 2023 la poscibilité da fá sorvisc volontars. La Junta provinziala á aproé les desposiziuns basa por i sorvisc zivii de chësc ann.

Sorvisc zivil volontar
Por n post söi 150 posć a desposiziun tl sorvisc zivil provinzial pó se candidé tl ann 2023/24 jogn y jones dai 18 ai 28 agn. Le sorvisc pó doré dai 8 ai 12 mëisc. I volontars pëia do na recompensaziun por les spëises de 450,00 euro. I ciamps d’aziun vá dal sozio-sanitar al sozial, y arjunj ince le laur cun la jonëza, la cultura, la natöra y la sconanza de jënt y di consumënc. Ince la formaziun de cosciënza y sport á posć.

Sorvisc volontar sozial provinzial
Tl sorvisc provinzial sozial de volontariat él ince en chësc ann 100 posć por volontars. Se candidé pó porsones dai 29 agn insö, che oress se inserí cun competënzes y esperiënzes a bëgn dla coletivité. Le sorvisc sozial provinzial pó doré almanco ot mëisc y se trá fora cina 32 mëisc, y tó ite sides 15 co 20 y 30 ores al’edema. Aladô dl impëgn vëgn chësc sorvisc retü cun 300,00, 360,00 o 400,00 euro al mëis.

Ativité por vacanzes volontara
Dales 6 ales 8 edemes döra tl isté che vëgn, danter i 19 de jügn y i 3 de setëmber, l’ativité di 120 scolars dai 15 ai 19 agn che oress se ativé tl acompagnamënt dla vacanza dla jonëza. Le recompëns é de 80,00 euro por 30 ores de sorvisc al’edema.

Al intern dla Provinzia él l’Ofize por les cuestiuns esternes y le volontariat che coordinueia i sorvisc volontars y informëia i jgon y les jones, les porsones adultes y organisaziuns söles poscibilités y les desposiziuns. Portadësses di sorvisc soziai é organisaziuns publiches y privates desco ince corporaziuns.  (Iaco Rigo)