Jí a studié tl’Austria

Data

02 de dezember 2015

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La novité é gnüda adalerch dala Junta provinziala de Balsan, che n’á baié zacan n dé dles poscibilités de cuatier por i studënc dl Südtirol che stüdia a Víena y Desproch.

Do la colaboraziun importmetüda da Balsan infora y dal’Euregio cun i trëi comuns de Soramunt y süa jënt, fóssel bun da fistidié che ince i studënc de Col, Fodom y Anpezo podess s’anuzé dles convenziuns che Balsan laora fora por i studënc tla Alma Mater dl’Austria.

C’él pa pordërt gnü fat fora zacan n de a Balsan?

"La Junta provinziala á tut la dezijiun da stlüje jö convenziuns por resservé alplü 55 cuartiers te ciases por studëntes y studënc a Víena y 255 te convic a Desproch por sostigní jones y jogn che stüdia tl’Austria", insciö la notizia, y inant: "La Junta provinziala pó stlüje jö convenziuns tl raiun nazional o te Paisc dl raiun cultural todësch por resservé n numer de posć da dormí por studëntes y studënc dl Südtirol te strotöres residenziales aposta. Tles convenziuns vëgnel ince fissé i criters por ti podëi pormez ai posć resservá defora dala provinzia. L’afit y les spëises che röia lapró é a ciaria dles studëntes interessades y di studënc interessá. Tl ann academich 2012/2013 êl 1564 studëntes y studënc che frecuentâ l’Univeristé de Viena y 4.071 l’Université da Desproch (dac dl’ASTAT)."
Le presidënt dla Provinzia Arno Kompatscher á dit do la sentada dla Junta provinziala: "La Junta de Balsan ó sostigní les studëntes y i studënc dl Südtirol stlujon jö convenziuns por resservé alplü 55 cuartiers te ciases por studëntes y studënc a Viena y alplü 255 te convic a Desproch." Les convenziuns döra 10 agn alalungia a pié ia dal ann academich 2015/2016.

Les condiziuns di cutiers por i studënc

Na comisciun d’esperc valutará les ofertes presentades aladô de chisc criters de valutaziun: l’afit nia massa alt, la lontananza dala sënta universitara plü dlungia, le numer dles studëntes y di studënc che é stá tla strotöra ti ultimi trëi agn academics, l’ultilité publica dl ënt y le prisc che vëgn pité. I standarg minims dla strotöra vëiga danfora: na ciamena singola o alplü dopla, na ciasadafüch te ciamena o alplü öna por alzada, l’azes a internet te ciamena.  (Iaco Rigo)