La Usc di Ladins

Cun 19 usc a öna y 16 decuntra á le Consëi provinzial da Balsan lité incö te na lita sora y daverta Arno Kompatscher a presidënt dla Junta provinziala. Arno Kompatscher pëia ia so terzo mandat da presidënt dl Südtirol.
Dla coaliziun de sostëgn por Arno Kompatscher y n govern mené dal SVP féjel pert indöt 5 partis: dlungia ala medema SVP ("Südtiroler Volkspartei"), i Freiheitlichen, i Fratelli d’Italia, la Lega y la Lista Civica.
La Junta provinziala nöia sará metüda adöm da 11 mëmbri: de chisc 1 ladin (Daniel Alfreider – SVP), 2 taliagn (1 Fratelli d’Italia y 1 Lega) y 8 todësc (7 dla SVP y 1 di Freiheitlichen).
La Junta gnará proponüda dal presidënt Kompatscher y litada dal Consëi provinzial ciamó dan la fin de jená 2024.