SUNS rua endò te la Ladinia!

Data

14 de otober 2016

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks

Ai 19 de november Moena ge dèsc alberch al festival internazionèl de la cianzon ti lengac de mendranza. L’é stat selezionà ence doi raprejentanc ladins: l musizist Marco Mattia e l joen grop “Berdon”


L’à inom “SUNS”, che per furlan vel dir “sons”, e l’é l festival internazionèl de la cianzon ti lengac de mendranza. L'é n event nasciù del 2009 tel Friul per scomenzadiva de Radio Onde Furlane col sostegn de l'Arlef (Agenzìa Regionèla per l lengaz furlan) con l'obietif de valorisèr e meter a confront la esprescions musicales più enteressantes e da color di picoi lengac. Dò i prumes egn SUNS é doventà itinerant, e chesta an l rua endò a Moena - olache l’era stat endrezà ence del 2013 - con n gran conzert en program en sabeda ai 19 de november da les 20.30 tel Teater Navalge.

L'organisazion à cernù per chesta edizion ot musizisć o gropes anter passa vint candidac che vegn da la mendranzes linguistiches de l'Europa Alpin/Mediterana prejenc ti teritories de Tèlia, Svizra, Slovenia, Austria, Franzia (Corsica e Ozitania). A Moena se podarà scutèr, te na risola de ritmes musicai e de idiomes desferenc, l grop ozitan del Piemont “Saber Système” con “La Libertat”; She, York, la proposta refinèda de la ciantautora romancia Sarah Clavadetscher che prejenta “Solitari”; l componist sard “Arrogalla” con “Is”; l ciantautor de la Grecìa salentina Rocco de Santis con “Kama”; l “rapper anormal” furlan Doro Gjat con “Discolce”; i ozitegn/francoprovenzai “Trip” con “Fan qui la viro”. Apede chisc l’é ben doi raprejentanc de la mendranza linguistica “de cèsa” che à passà la selezion: l musizist Marco Mattia da Vich che prejenta l tòch “Maraveous” che ge dèsc l titol a sie prum CD, vegnù fora chest an e i joegn “Berdon”: 4 studenc del Liceo de la Scola de Fascia che à metù sù da pech l grop, desmostran sobito talent e grinta. A Suns i propon “La not di Krampus”.

La machina organisativa, jà envièda via da meisc, é vidèda da la sociazion de musega e cultura de Moena “La Grenz” col president Enrico Tommasini, col didament di promotores furlegn col diretor artistich Leo Virgilio, e l'event é realisà col sostegn finanzièl de la Provinzia de Trent - Servije mendranzes linguistiches - e de la Region Trentin Sudtirol e col sostegn del Comun General de Fascia, del Comun de Moena, de l'Azienda de Promozion Turistica, de l'Istitut Cultural Ladin e de la Usc di Ladins.

SUNS Ladinia farà ressonèr tel Teater Navalge la rica esprescion di lengac manco cognosciui, valorisé da la prejentazion de l'ator furlan Michele Polo e de la joena ciantarina ladina Martina Iori - jà venjidora de Suns del 2014 - che podarà ge fèr scutèr al publich sia bela ousc.

Endèna chest conzert ecezionèl, con entrèda ledia, l publich podarà sostegnir i musizisć de cèsa o i gropes che i conscidrea de maor valuta: la esibizions vegnarà valutèdes da na jurìa de esperc che chierirà fora i doi tòc che se vadagnarà l'amiscion a la finèla SUNS Europa, che sarà ai 3 de dezember a Udin, olache se metarà a confront i miores musizisć de la comunanzes de lengaz minoritèr de dut l continent.

 
 (Lucia Gross)