Dolomitenfront: n musical rock al Filmfestival

Data

01 de mei 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks

L’é stat metù ensema con protagonisć de noscia valèdes un di film en program tel gran event cinematografich de la mont de Trent.


 - Va inant l 65° Filmfestival de la mont che per 10 dis, enscin ai 7 de mé, viventea la zità de Trent. Te chesta edizion l’é en program 148 apuntamenc e scontrèdes con 260 ghesć.

I é peé via ai 27 de oril con Reinhold Messner, jà cognosciù dal Filmfestival ma chest an te la neva viesta de regist, ajache insieme a Hans-Peter Stauber l’à fat l film “Still Alive – Dramma sul Monte Kenya”, moscià per la pruma outa te la Tèlia apontin a Trent l prum de mé.

Desche semper no mencia l gran tendon de “Montagnalibri” te Piaza Fiera, 31^ Rassegna internazionèla de l’editorìa de la Èlpes e semper tel chèder del Filmfestival l’é da recordèr ence che l’artist fascian Claus Soraperra met fora sia esposizion dal titol “Liquidis: le identità fluide delle Alpi” che se podarà veder enscin ai 16 de mé te la Cèsa de la SAT.

Anter i evenc n moment emportant l’é stat en domenia ai 30 a l’Auditorium S. Chiara con l’alpinist Fausto de Stefani te na sera dal titol “Nepal: tra sogni e realtà”.

Per chel che vèrda i film, enveze, prem segnalèr l projet “Dolomitenfront”, nasciù da Ana Vukovajac e Roberto Falsetti e ruà con Sara Maino enscin a la produzion cinematografica finèla, ametuda a chest prestigious event cinematografich.

“Dolomitenfront” rejona de n temp indefinì tel davegnir olache l mond l’é endodanef en vera e n grop de musizisć se troa a cogner combater sul front sa mont, te n fort. Se trata de na opera rock, con musega e storia originèles, sonèda e registrèda dal vif a Forte Dossaccio via per l’an 2015. Del 2016 l’é stat realisà l film, che l se à jà vadagnà l pest de la critica desche mior fil musical curt al Filmfestival musical MUVI de Lisbona e l’à tout pèrt al Peace on Earth Film Festival de Chicago.

Te chest projet, sostegnù da desvalives enc locai, l’é stat tout ite n muie de joegn atores e musizisć de la valèdes de Fiem e Fascia e del Trentin, apede a profescionisć de livel internazionèl per la cèsa de produzion Shaking Foundations Multimedia Productions (Falsetti- Vukovojac GbR), con senta a Berlin.

A chesta produzion dassen enteressanta, che vel portèr dant n messaje contra la veres de ogne temp e per la pèsc, à tout pèrt anter i etres ence Emma Deflorian desche regista teatrala e i musizisć e atores Erik Melillo, Mattia Deville, Alessandra Felicetti, Martina Cavulli e
 Lorenza Vanzo.

L film vegn manà fora al cinema Modena en mèrtesc ai 2 de mé da les 21.30 (l’é da se enformèr se l’é amò post) e en sabeda ai 6 de mé da les 19.00.

 (lg)