La Usc di Ladins

Te n tëmp olache al vá dër de moda les defilades di malans, orunse nos recordé ël - San Micurá. Al é bunamënter un di sanc plü conesciüs y ince plü aprijá ia por l’ann dla dlijia. Chësc ince deache süa figöra é liada a tröpes tradiziuns popolares. Ince iniann rovará le Vësco te tröpes scores y scolines ladines, por jí a ciafé i mëndri y forsc ince ti porté zacotan de nusc, mandarins y val’ de ducejin. Dër adaldërt él ince gnü la nëi, che á curí nostes contrades cun na cutra blancia y ti dá insciö ince ala festa n’atmosfera particolara.
La figöra dl sant vá zoruch a Micurá - vësco da Myra, de chël che an sá pordërt dër püch. Al dess ester nasciü incër l’ann 280 do Crist a Patara tla Turchia. Bele cun 19 agn él gnü consacré prou y é spo deventé abat dla badia de Sion. Canche sü geniturs ê morc dla pest, ál arpé düc sü avëis y á metü man da i partí fora ai püri. Plü inant gnôl lité vësco dla cité de Myra, ince tla Turchia. (Fontana: heiligenlexikon.de).

La liënda dl formënt
Cotantes é les liëndes che se roda incër le Sant: öna de chëstes cunta che la cité de Myra ê gnüda atocada da na gran sëciora y ciarestia, che la jënt messâ dassënn patí la fan.
N bel de rovâl tl pórt dla cité deplü bastimënc che ê implis sö pro cun formënt, destiné al imparadú. Canche le vësco Micurá ê gnü alsavëi, êl jü a perié da podëi n’avëi zacotan de sac, por pascenté la jënt. I patruns indere n’orô dé ca nia, deache döt ê pesé avisa y sce al ess falé ince ma püch, fossi gnüs dassënn castiá. Sön chëra impormetô Micurá che sce ai ti ess dé ca formënt, ne ti essel mancé nia por l’imparadú. Insciö ti gnôl dé chi 100 sac de formënt y belavisa, canche i bastimënc rovâ al travert, ne falâl nët nia. Cun i sac che an ti â indere desćiarié a Myra, án podü pascenté la jënt por agn alalungia.  (pablo)