Comentar de pruma

Data

14 de dezember 2018

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
No se pel morir coscita
No se pel morir coscita. L'é l coment, la constatazion ti dis dò la tragedia de Corinaldo. Per jir a scutèr l conzert del cognosciù trapper Sfera Ebbasta i se binà de n muie, de massa. I se à troà enmuié te discoteca per na ocajion de gran rechiam: scutèr un di fenomens musicai de maor nonzech del moment, che l'à passa n milion de follower su Instagram. N conzert da no perder per nesciuna rejon. E co ge dèr de contra? Ence nos da joegn assane fac i sauc mortèi per jir a scutèr nosc ciantarin preferì, ence se fossa da se fèr vèlch domana sul percheche n ciantarin che passa messajes no proprio positives l'é coscita "seguì".
L problem te chesta ocajion l'é che nesciugn se aessa mai spetà che zachei sprizenee te l'aria n
spray "urticante" al peveroncin. N'èrma che é nasciuda per defendura l'é doventà n'èrma per fèr del mèl.
Co se fèjel ades a se fidèr a jir olache l'é n muie de persones una su per l'autra, a lascèr jir nesc fies ai conzerc, ades che vegn ence la festes de l'ultim de l'an e i domana de jir te discoteca a festejèr?
L'é na sozietà malèda chela olache no se pel nience più se goder n conzert de musega zenza aer tema. L'é na sozietà malèda chela olache n joen doura n'èrma contra etres joegn desche el per creèr panich. L'é na sozietà malèda chela olache n student te na scola sprizenea peveroncin per veder la reazion di etres. Ence gé é fies de chela età, ence gé desche duc i genitores son cruzièda.
Ma la tema crea desfidenza e la desfidenza crea odie, l'é n cian che se zaca la couda.
Mencia l sens de responsabilità, la azions che se fèsc les à semper sia conseguenzes, ence se somea braùres da nia. Fin olà se pelel ruèr? Se dajone n limit? Ge l dajone ence a nesc fies? Percheche dassen no se pel morir coscita.  (de Monica Cigolla)