Fugatti a la radunanza de l'Istitut Cultural Ladin

Data

16 de dezember 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
En lunesc ai 17 de dezember da les 6 da sera vegnarà rejonà de l'atività de l'ICL, di mudamenc pervedui per la Presidenza e l Consei de aministrazion e vegnarà prejentà n nef filmat musical su “La Cianzon de Val de Fascia".


Entorn la fin de l’an, desche semper, l’Istitut Cultural Ladin tegn sia radunanza generèla, perveduda dal Statut per portèr dant i resultac de sia atività e tor sù idees e reflescions per l davegnir.

Chest an l’apuntament arà n segnificat del dut particolèr ajache, aldò de la normatives, rua a compiment l secondo e ultim mandat de Antone Pollam desche President de l’Istitut e te curt temp la Provinzia provedarà a nominèr l Consei de Aministrazion e l President neves.

Te chesta ocajion à confermà sia partezipazion ence l nef President de la Provinzia Autonoma de Trent, Maurizio Fugatti, che a chesta vida podarà tor n prum contat col mond cultural ladin e dant da dut co l’Istitut, che da passa 40 egn laora per documentèr, tegnir sù e valorisèr l lengaz e la cultura ladina.

Ajache l’é de gran emportanza che giusta te chesta ocajion la Comunanza de Fascia fae sentir sia ousc e sia prejenza, l President Pollam envìa de cher i raprejentanc istituzionèi, i esponenc de la sociazions, de la categorìes economiches e turistiches, de la scola e del mond culturèl ladin a chesta scontrèda, da olache pearà via n nef percors ence per nosc Istitut envers neva endesfides e neves obietives.

N nef video su “La cianzon de Val de Fascia”

Al scomenz de la radunanza vegnirà moscià per la pruma outa, al President Fugatti e a duta la jent, l video musical su “La cianzon de Val de Fascia”, na composizion de Luigi Canori per solisć, cor e orchestra su paroles de Francesco Dezulian del Garber, realisà da l’Istitut en colaborazion con Filmart e Dolomiti TV.

Na ciantia che jà con la melodìa populèra vegnuda cà da ìsoles de Ost-Frisian (nord de la Germania) l’é doventà na sort de “chèrta de identità” de Fascia ladina, ma che segur con la musega de Luigi Canori à arjont n svilup coral-sinfonich de gran efet, de gra a la orchestrazion del maester Gianfranco Grisi e la bela interpretazion di cores de Fascia touta sù del 1995. 

Ades te la verscion sot-titolèda per talian, ingleis e todesch, chest video podessa esser n bel “biliet da vijita” da ge sporjer ence a chi che vegn da foravìa.

Poder veder dantfora chest nef filmat l’é na rejon de più per tor pèrt a chest apuntament, en program en lunesc ai 17 de dezember da les 6 da sera te la sala Heilmann del Museo Ladin de Fascia.