Letöra

Data

18 de merz 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
I ún 30 agn de www (world wide web / rëi ampla mondiala), mo i ne sun pa gnüs plü scicá!

N comentar dl redadú Iaco Rigo
Ci che an pó dí, é che l’internet ti á dé cina sëgn a miliarg de porsones la poscibilité da se mostré, se fá reclam, se informé, se colié, ciafé sö, descurí, dí la süa! Mo i n’ún nia bria da miné che le www nes ais salvé da na apocalissa, o bëgn? Sperun almanco che al ais mioré n pü’ le monn, mostran y publizisan iniustizies y problems dla umanité. La tecnica y tecnologia é ma de öga sce ara dëida, y chël féjera ma, sce la jënt sá olache al é ince n confin, n "assá". Da fá festa por i 30 agn de www n’él nia, ponsan a chës miliuns de porsones che é aldedaincö dependëntes dal internet (dai socials y dal fonin dantadöt).

I sun oramai avertis che la bona informaziun ne scinca gnanca l’internet, porchël dess les scores ponsé sura dui iadi da mëte de na pert i bogn libri che cunta de storia y de stories vites söla pel. Al me toma ite trëi scriturs che messass ester al ordin dl de inant te nostes scores y tles scores de döt le monn, cun sü libri: Erich Maria Remarque (che á scrit por todësch), Mario Rigoni Stern (che á scrit por talian) y Swetlana Alexjewić (che á scrit por rus, y scri dötaurela). Al é trëi testemoni dla storia sozedüda te indöt 100 agn t’Europa (tles veres y tl fanatism), cun l’Europa (imperialista, ditatoriala, nazifascista), che nes atoca ciamó ince nos, de por de. I libri de chisc trëi scriturs vel deplü co 30 agn de "world wide web". Ajache al é na desferënzia danter la realté y l’animaziun!