Les tofles dess ester de lëgn

Data

19 de merz 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La Junta Provinziala dl Südtirol s’á dé jö cun n regolamënt unitar por la segnalaziun di trus da jí a pe.
Te süa sentada di 19 de merz á la Junta Provinziala dl Südtirol aprové les diretives por la marcaziun y segnalaziun unitara sön i trus da jí a pe. Bele dl 2016 â la Provinzia aprové y sotescrit la ”Acordanza por la revalutaziun, le mantignimënt y l’anuzamënt di trus tl Südtirol”, deboriada cun i patruns di grunc y chi che i mantëgn. Tl’acordanza vëgnel danter l’ater spezifiché che chi che tëgn i trus mëss fistidié dla manutenziun ordinara, deperpo che i Verdabosc fistidiëia por chëra straordinara.
Ci che manciâ ciamó, ê na diretiva unitara por la marcaziun y la segnalaziun di trus. Do plü incuntades cun chi che manajëia i trus éra garatada. Ala pert êl l’Alpenverein AVS, la Club Alpino Italiano CAI, les organisaziuns turistiches y les aministraziuns di parcs naturai. Tl detail nen jôra dantadöt da definí sce les tofles de segnalaziun dê resté inant de lëgn, o sce an ess messü tó ca materiai che tëgn deplü, sciöche metal o plastica. Ala fin éson rová düc a öna che al dess inant gní tut ca lëgn, sciöche l’assessur al turism Arnold Schuler spliga: ”Lëgn é plü bel y ince n simbol por Südtirol”. Tla conferënza stampa do la sentada de Junta á le presidënt dla Provinzia Arno Kompatscher ince anunzié la tematica di lingac sön les tofles, recordan che ”les scrites mëss ester te dui lingac, mo an pó ince adoré pictograms. Pro i inoms di posć mëssel indere ma gní tut chi che vëgn efetivamënter adorá.” La dezijiun toma da caje a caje, dij n comunicat dla Provinzia.  (pablo)