Se no ades, can pa?

Data

14 de auril 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Letra averta a l’Union Autonomista Ladina.


L’é passà beleche sie meisc da la litazions dai 21 de otober, e mencia pech più che n an da n’autra scadenza litala de gran emportanza per la Val de Fascia. Te dut chest temp la jent no à più sapù se la UAL la é amò en vita, se l’é amò la volontà de jir inant, de mudèr o de seràr su baraca, lascian morir fora zenza dir nia na organisazion che à fat la storia de Fascia te chisc ultimes 40 egn. Unica ecezion, l document manà fora dal segretèr Anesi dintorn via la costion di jouves, sobit rebechèda dal president de la lista “Moviment ladin de Fascia” nasciuda en ocajion de la litazions provinzièles: oramai somea che ogniun vae per so cont.

Per auter, de chesta lista no se sà trop: i joegn se bina, descor, ma anter la jent fin ades no l’é ruà fora gran fat. Ge volarà so temp. Purampò de otober chela lista l’à abù 1678 litadores che ge à dat fé (contra 1832 de la lista che à avent) e chisc spetassa de saer se l’é zeche che va inant o no.

Da l’autra man, saon che Michele Anesi à dat jù da pez sia dimiscions da l’encèria de segretèr politich de la UAL, l Diretif l’é “en prorogatio” e l stenta adertura a fèr sentèdes col numer legal; l president Bepe Detomas, dò aer renunzià a se candidèr a la litazions, à declarà de se trèr fora da la politica, amancol per n trat (duc e doi – se sà ben – i à da esser rengrazié de cher per dut chel che i à fat e dat te duc chisc egn). Coscita aboncont dut risćia de jir dò brea jù.

Te chest moment la jent de Fascia, chela che no se recognosc te la neva “governance” che à te man l destin de noscia val, no à o no troa ponc de referiment. Se pel capir la delujion de chi che se à metù a la leta e à metù fora l mus fin ades, demoralisé dal vent che seghita a sofièr de rebuf; se pel capir tant senester che pel esser fèr mingol de autocritica, cogner magari recognoscer fai o mencianzes, ma aboncont no se pel lascèr mesa la popolazion de Fascia zenza ousc, zenza raprejentanza politica.

Per chel che revèrda l’UAL, l’é ora de tor dezijions: per Statut chesta sort de dezijions ge pervegn a la Radunanza generala, e per doer moral a duc i sentadins che se recognosc amò tel “Moviment Ladin”, chel nasciù a Dispruck del 1905, che del 1946 à metù en pé “Zent Ladina Dolomites”, sobito dò l’Union Generela e l’Union di Ladins de Fascia.

Donca preon de vif cher l Diretif de l’UAL, con a cef l President e l Segretèr politich, de convochèr più prest che en prescia la Radunanza generala, per serèr su più prest che en prescia chesta situazion entorta. Se fae inant i joegn, se fae inant chi che à voa de lurèr amò per l ben de la comunanza, se nominee amancol n Comitat provisorie per gestir la transizion, l mudament o l renovament; o se no, che sie la Radunanza generala a dezider de serer sù, ma con onor, l’esperienza gloriousa de l’Union Autonomista Ladina.

Se no ades, can pa?


Fabio Chiocchetti
Cesare Bernard
Stefania Chiocchetti
Stefano Weiss
Franco Ghetta
Annelise Vian
Fernando Brunel