Chirí cun ”Chiri”

Data

18 de auril 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
”Chiri” se tlama le portal de archirida por scolars che la biblioteca Teßmann presentëia chësta jöbia. Lassura ciafa i jonins informaziuns y contignüs verificá.
I me recordi avisa, canch’i ê ciamó studënt: sce al ê da fá n’archirida por la scora, o da s’arjigné ca por n referat, jôi a me do les informaziuns te biblioteca. Iló ciafâi i libri ch’i adorâ y ch’i messâ spo ince me studié jö plü avisa. Intratan s’ára mudé la cossa: la tecnica á fat vari da gigant, i sun rová tla era dl digital y di smartphones, cun l’internet sciöche fontana prinzipala olache i jogn vá a se do ci che ai ó savëi. Por tan ütl che al sides, á chësc stromënt ince sües tënores. Les informaziuns é n gröm y nia dagnora n’él tler da olache ares vëgn. Insciö él ince dër saurí da rové pro informaziuns falades - les famoses fake news.
Ince tla biblioteca provinziala Teßmann s’un án intenü de chësc svilup, tla consapevolëza che na biblioteca ne sciafia nia da tigní le vare cun i gragn portai d’archirida sciöche Google & Co.. Porchël án cherié n portal d’archirida por scolars da 13 a 19 agn, che á ciafé l’inom ladin de ”Chiri” (la dërta pronunzia foss chirí cun azënt final), da ciafé sot a www.chiri.bz
Sön chësc portal ciafa i scolars ma informaziuns verificades danfora da na redaziun, che vëgn tutes dales banches dac de Brockhaus, Munzinger y Statista. Responsabla dl proiet é Monica Kostner da Corvara/Maran.

Deplü ciafëise t’La Usc di Ladins di 19 d’aurí 2019  (Pablo)