Doi fascènes per la Cambra

Data

17 de auril 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Cristina Donei e Rosa Rizzi é states candidèdes per la litazions supletives di 26 de mé, respetivamenter da la coalizion de zenter cencia autonomist e dal Moviment 5 Steiles.

Ai 26 de mé te la litazions per la Cambra di Deputac sarà na bela raprejentanza de Fascia. Defat ensema con la litazions europeènes sarà ence la litazions supletives per i candidac che era stac lité al Parlament ai 4 de mèrz de l’an passà ma che, dò la litazions provinzièles di 21 de otober 2018, i aea cernù de renunzièr a l’encèria de Roma per tor sù l mandat arjont a Trent.

Chest tant l’é sozedù ence tel Colege de Perjen, che tol ite Fascia, ensema con Fiem, Piné, Tesin e Valsugana. Chiò defat d’aisciuda del 2018 l’era stat lità al Senat Elena Testor e a la Cambra  Maurizio Fugatti, che d’uton l’é doventà president de la Provinzia.

L’é amò pech temp per depojitèr simboi e candidatures, e apontin chisc dis l’é stat ofizialisà la candidatura de ben doi candidates ladines, doi eles de Fascia.

L Moviment 5 Steiles à cernù per l Colege de Perjen Rosa Rizzi. L’avocata fascèna da Sèn Jan era jà stata candidèda te la lista 5 Steiles te la litazions provinzièles de l’uton passà. “Mia candidatura é stata ofizialisada chisc dis dal Moviment, che l’à metù en doura n sistem de selezion di candidac che aea dat sia desponibilità travers na comiscion de “savesc”, ajache l’era massa pech temp per jir su la piataforma Rousseau - la ne à dit - e gio son dò che me enjigne duc i papieres che serf e spere de ruar a aer dut a post. Canche saré segura podaré scomenzar a rejonar de proponete, programes e priorità.”

La coalizion de zenter cencia autonomista à cernù enveze la ex Produradora Cristina Donei. “I me à fat la proponeta e no è abù trop temp per dezider, donca no è podù la condivider con nesciugn, nience te l’Union Autonomista Ladina, de chela che me sente de portar inant i valores. Èazetà zenza ge pensar trop, perché me saeva che l fat che i aesse cernù na raprejentanta de le mendranze, na ladina e na femena, sie n bel segnal. Pense che sie besogn de laorar per renforzar l’autonomìa de noscia Provinzia, te chest temp senester, e che duc cognon esser responsaboi: per me esser responsabola te chest moment vel dir no se tirar endò, ence se sè che l’é na endesfida n muie senestra. Giö voi portar dant l’atenzion ai teritories, a le femene, a le mendranze, ajache te nosc Colege l’é dute trei le mendranze linguistiche del Trentin e soraldut volesse portar n pensier positif te n moment de gran desafezion de la jent per la politica. Per chel che varda la coalizion - à dit amò Cristina Donei - l’idea l’é chela de far na neva “Aleanza Democratica Autonomista”: i é dò che i ge laora e spere che i rue ti tempes a far registrar l nef simbol.”

Per la candidatura del zenter dreta enveze vegn fat l’inom de Sergio Divina, ma no l’é amò nia de segur, ampò la dezijion definitiva cognarà vegnir palesèda chisc dis.  (Lucia Gross)