Comentar de pruma

Data

17 de mei 2019

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Europa ales urnes
Te otedé vá ince i ladins a lité le parlamënt nü dl'UE. Al é important jí, ajache ma cun lité müdon valch. Sëgn éra insciö che gnanca mec i zitadins ne vá - desche al é usus - a dé jö söa usc, sciöche la UE ne foss daldöt nia importanta. L'Europa y la UE á da fá cun vignun de nos vigni de, chësc messass oramai ester tler. Ci nen dí spo che l'Europa é burocrazia, ince vëi: mo sce i orun la sburocratisé, él da se paré ite les manies y nia lascé jí les cosses sciöche ares vá.
Chësta lita, arata politologs, mudará la UE, al gnará sö na generaziun politica nöia y na generaziun nöia de idees. L'Europa ne pó nia ester n aparat stare, al é dërt che al se modelëies. Te na Europa manco burocratica, manco
afarista (manco rapresentativa de conzerns y lobbies), manco despartida tles politiches internes y esternes, se sintiss i zitadins plü europeics. Desplazé él da mëte en discusciun chësc lian de zitadins, naziuns y cultures! L'Europa é garanzia de pesc - vëgnel tres dit, mo chësc vel ma por so intern, bel fossel, sce l'Europa foss efiziënta ince por le marcé de ermes y i dërc umans fora por le monn. Ma l'Europa á le privilegh, gnü dé dala storia, da porté pesc y bëgnester. Y l'Europa resta le cuntrapëis ince sëgn tl brac de fer prigorus di USA cun la Ruscia, l'Oriënt Vijin y la Cina. Tan sterscia che l'Europa vel söla paladina internazionala depënn dai ziadins che crëi te ëra. Porchël mëss i ziadins se avijiné deplü ala UE, jí a lité y daidé mioré döt l'aparat. Al vëgn dit che al foss sëgn gnü le momënt di populisć t'Europa, chi partis y leaders politics che savess avisa ci che al foss da fá cuntra i problems che i ún. I populisć mosciöda bele les chertes ti governs de val' stat y regiun importanta, mo jí a lité cun le slogan "tolun jö l'Europa, tolun jö l'Euro" é na farsa. Bunamënter cunta aldedaincö chisc slogans deplü co val' bona idea por ocupaziun y la cualité di sorvisc publics tl sozial, sanitar y tles scores! Vignun capësc de ci che i nen baiun, ala fin ne salva pa degun politich populistich la democrazia, y döta l'Europa!  (de Iaco Rigo)