La Usc di Ladins

Nce chëst ann ie l’ansciuda tla Val de Isarch y tl Wipptal tl sëni dl’ena gastronomica “Sëures dla Val de Isarch”. Doi enes alalongia iel la ustaries che fej pea da Sterzing nchin Perbian che vizia si ghesć cun derzedes gastronomiches y nvieia a ciarcë.
La natura se descëida y mplenësc la mëises cun d’uni sort de de bona roba. “Sëures dl Val de Isarch” ie l’ena gastronomica plu vedla de Südtirol y ie na scumenciadiva metuda a jì dala Lia di Osć dl raion (HGV) che uel valorisé la ufierta dla spëisa dla Val de Isarch y dl Wipptal.
La triada o l raport danter produtëur, ost y ghest à na mpurtanza fundamentela ntan chësta enes gastronomiches. Per anjinië ca i cëives tla ustaries che fej pea, vëniel tëut ca mo de plu prudoc dl raion che ti dà ala rezetes na sëur sterscia y autentica. Y ora de chël vën a chësta maniera sustenii de pitli prozesc tla provinzia y renfurzà l messaje dla merca che ti dà pëis ala relazions danter produtëures, osć y ghesć.
Nscila vëniel tëut ca prudoc locai coche prudoc dal lat, salverjina y ueves da alevamënt alalergia, verdura coche craut, patac y runi o nce blava coche orde, furmenton, siela y ierbes y spezies.
Chëst ann iel per l prim iede unit a s’l dé pra la “Sëures dla Val de Isarch” na cunlaurazion cun i prudoc cun la merca de cualità de Südtriol coche l miel o i mëiles de Südtirol IGP. Chësta materies primes de cualità auta y nce l ciociul dla region dl Cunsorz per la prutezion dl ciociul de Südtirol abines tl menù y sotrissea donca la cualità di prudoc. Sibe i prudoc coche nce i produtëures vën ntegrei ativamënter tl cheder dl prugram dla “Sëures dla Val de Isarch”.
La direzion dl cumité dla scumenciadiva rengrazia duc si partner y sponsores che juda uni ann a mëter a jì chësta enes gastronomiches.
Juech cun de biei pesć
Da tradizion pra l’ena gastronomica toca ntant nce l juech cun pesć, ulache n possa nce fé pea online. Duc i partezipanc y la partezipantes à la puscibltà de vëncer bonns da jì a maië te una dla ustaries che ie leprò. L se paia perchël a fé pea!

La ustaries che fej pea pra la „Sëures dla Val de Isarch” ti dona nce chëst ann na pert dl davani ala „Trotzdem reden“, che à l fin de sustenì persones che ne n’ie nia plu bones de rujené.

Sun www.eisacktalerkost.info iel da abiné duta la nfurmazions n con’ dla Ena gastronomica dla Val dl Isarch.