Lëures te Chemun

Data

16 de agost 2019

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
I gran lëures »publics«: de garatei y de manco garatei:
Te nosc luesc y te nosta cuntredes ons aministrazions scialdi ulentives y nsci garata vel’ gran lëur datrai nce te n curt tëmp. De chisc lëures vëniel nce dit che i vën fac dala man publica. N cajo de n tel lëur scialdi bon y defin garatà ie dessegur l gran rundel che ie unì fat cun bona prëscia y druch sun la streda Tresval n śich dan la Vila Venezia, sce n va itevier, y che lascia śën pro de furné ite y de ruvé sun la streda zentrela de Urtijëi, la streda Rezia, zënza i problems che l fova dant, a se aspité ca l mumënt de pudëi raidé ite; y do avëi raidà ite pòssen a man drëta furné de viers dla Cësa Bruma y de Urtijëi ovest, o de viers de man ciancia y arjonjer nosta plaza zentrela de Sant Antone, cun de ndut
dejedot lueges da lascé i auti a man ciancia, o raidé nce a man drëta, zirca n 60-70 metri per pudëi pona furné ju y ite tla grandiscima garage da Mauriz-Hotel Adler. Iló iel na bela gran cumpëida de jënt che possa lascé l auto ajache la à la lizënza.
N auter gran lëur de viabltà, che ie unì fat te n tëmp dessegur da record te chisc doi-trëi mënsc passei y che à plu dessegur nce custà na cërta soma nia tan pitla, ie la costruzion, duta de peton y fier y pona de asfalt sëuravia, che lascia śën pro de furné ite dala streda Tresval o ora tla medema gran streda, tl pont dla Tresval che ie danter la vedla sia dl sigat Egon Demetz y la cësa antica Gustin, al didancuei defin renuveda y duta bela, de chëla che Urtijëi se lecorda mo da scialdi plu da giut ca. Y tlo iel śën la gran dumanda feter filosofica drëta y de gran valor: ne pudëssa pa chësta nfrastutura tan nueva nia vester na cossa mpue’ sëurameneda o faleda o de chëla che l ne n’ie nia debujën? Do na usservazion scialdi avisa, de facto sun luegia, cun na cërta bona cunescënza dla situazion generela, iel da pudëi dì che l possa furné ora de viers dla Tresval, y sun chësta messan pona auté de viers dl tunel, chëi che sta iló – y/o à na luegia da lascé l auto – y i auti o camions che à desćiarià tla valguna butëighes che ie iló ntëurvia. Per desćiarië iel nce dessenià ite na cërta bona lerch vis a vis dla cësa-garni Demetz. L ne n’ie da calculé degun auter
auto oravier, ajache dala streda strënta de Pedetliva ne pòssen dala raida da Mauriz nia ju, y dala Pitla y dala gran Plaza de Sant Antone ne pòssen ënghe nia ite de viers dla nfrastrutura nueva, y perchël pòssen dì che l ie na situazion de n »stop total« per i auti de Urtijëi n generel! La situazion canche n furnea ite dala streda Tresval ie do mi usservazion dessegur plu saurida da cunscidré, ajache l possa mé ite auti che desćëria y che à na luegia da parchejé. Per l rest ne n’ëssa auti nia da crì, ajache la streda Pedetliva ie dsareda, y nce tla direzion dla Pitla y dla gran Plaza de Sant Antone ne n’iel nia mesun furné, ajache l ie massaries da ciofs metudes aposta. Chësta ie plu dessegur la situazion coche la se lascia udëi y usservé ubietivamënter! N funzion de chësta realtà pudëssen povester nce dì che fé chëla gran nfrastrutura cëra ëssen povester nce pudù se sparanië, lascian pro inant che i auti unissa dala Plaza de Sant Antone ite, te chëla luegia y streda danter l Café Haiti y la butëiga de artejanat Moroder.  (Oscar Prinoth, Urtijëi)