Ladins da pitli ensù

Data

12 de november 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L bel articul De Nicoletta Riz y les bones respostes de Thomas Zulian de Inout te La Usc di Ladins di 25 de otober me invieia a scrì val' risses. Paroles coche l titul dessoura àldon de rer n iade; cie che ressona tresfora é plutost: »plurilinguism plu adora che la và, se daurì al mond, a les desfides de nost temp«. Al n'é dessegur nia saorì de ciafé la derta mesura anter l debojen de mantegnì nosta identité y chel de se mueve anter les autres, ma al é dlonch na cuestion de valuta, de preferenza y coordinament. En pue contra la minunga de valch espert y la politica de educazion y istruzion atuala sonsi ie sun la pert de chi che jissa plu plan y lasciassa cresce i mutons zenza l stres di gragn y dla sozieté, te si element plu da ciasa. Da emparé él temp tant che an vuel. Oramai ruva tost duc i joegn a la matura, y spo é la vita entiera na scola. Perauter ne vál nia debojen de ester dlonch i miours, ma de sté tla vita sun nostes giames, de avei nostes idees y valutazions, cis te n temp olache dut nes vegn dé dant dal computer y dai media. Ma derevers a l'intervista de Riz y Zulian. »Co é l ladin vedù anter i joegn?« se damanai, y la resposta: »a na pert ne dál deguna oportunité (degun utl), ma tres deplù creii che al sie valch che nes carateriseia y che al sie da sostegnì«. La pruma minunga é ben chela vedla di gragn che mina che con l ladin ruven demé a Peraforada, a Pontives y fora ensom les autres valedes; la seconda vá dessegur tla derta direzion y fej plajei. L lingaz ladin ne carateriseia y desferenzieia nia demé, ma al é la fontana de nosc valours culturai y sentimentai, al é la memoria de nosta storia y l liam milenar de nosta vita deberieda; al é la liedeza y la segurté de vignun y de duc adum, dla comunité ladina. Conscidran chesta valuta dl lingaz, che i adoron per vive enstesc y per se confronté con i autri , dijédeme vos cie emportanza che al à! Ma ie me damane ciamò does cosses: plu lingac che i ladins empara, plu relazions forestes che i ladins à, ne adorai forsc un n lingaz te chel che ai se reconesc deplù, con chel che ai se fej plu saorì, con chel che ai é plu segurs? Ie arate ben! Y la seconda domanda é chesta: i ladins se stà bon economicamenter, cotanc ence truep bon; vál perchel debojen de dé fora o fà marcé con dut o pòssi pa ence se tegnì valch per se enstesc, i valours personai, sia cultura, si lingaz? Ie arate ben che ai dess s'l tegnì y s'l mantegnì l plu che ala và, pro i pitli, joegn y vedli.  (Carlo Willeit, Sëlva)

Galaria retrac