Él arsegurà a duc l derit a la sanità!?

Data

13 de november 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L'é la Costituzion taliana medema che l lo declarea, coscita dute le legi internazionale che varda a la sanità.
Aboncont per i zitadins extracomunitares »no regolares« e ence per i taliegn zenza ciasa, poder aer azess a chest derit vital l'é dassen senester, dijesse beleche empossibol, a cauja de na lingia zenza fin de ostacoi soziai, culturai, economics, pregiudiziai; per poure che vegn fora da soa condizion de emarginazion, da ultimes e desmentié.
Per soa fortuna, ma spere che sie ence n ciampanel e n stimol per duc noi, l'é organisazion de volontares, desche l GRIS, fate da medizi e infermieres che i se à metù a la leta de chi peres crisć che, per le motivazion jà dite sunsora, no i é bogn de ge ruar apede a le cure sanitare che i aessa de besegn de rezever. E anter chisc l'é ence taliegn »doc«, che per soa desfortuna i se troa te la condizion de barbons o de no aer na ciasa e i vif per strada. Che l Conseier Cia l die che chest sie »n sberlon a chi lurieranc e a chi veies che i cogn se meter en couda e spetar«, chest l'é fora da vigni logica e da ogne ragionament.
Che i lurieranc e i veies, e en general chi che à de besegn de cure, i cogne spetar e se meter en couda, chest no l'é zenz'auter a cauja di servijes che i medizi o infermieres volontares i met a la leta di ultimes de la fila o, amò piec, de chi che i é adertura lascé fora da la fila.
Da meter en discuscion sencajo, caro Conseier Cia, l'é l sistem sanitar enstes, con na mencianza cronica da far poura e te duc i setores sanitares, de medizi e personal sanitar en general. Basta lejer i giornai de chisc dis per entener le dificoltà che l'é te le RSA del Trentin, olache mencia infermieres e OSS, en proporzion da far poura: basta vardar le mencianze de medizi de familia, con i ambulatories che vegn seré, soraldut te le zone più desvantagiade e de periferia; basta lejer che te la Talia la mencianza de medizi la é te la zifra de mile e mile e te le università de setor se met sù l »numer serà«, i joegn medizi i é beleche oblighé a se n jir dal paìsc per troar lurier. E coscita se pel dir ence de infermieres e personal sanitar.
Chisc scì che l'é sberlogn e mencianza de deric per chi lurieranc e veies che, con la nezessità de cure, i cogn far coude che no fenesc più e spetar meisc.
Lascion de criticar chi che da volontares, e a titol deldut debant, i deida i extracomunitares »no regolares« e i taliegn zenza ciasa, che se no fossa coscita i cognessa jir ti Prumes Aiuc di ospedai, jà più che piens, a i embociar amò de più.  (Floriano Bernard de Cechinol da Pera)

Galaria retrac