N diretour autonom

Data

18 de november 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
En cont di »diretours« al intern dl departiment ladin dla Provinzia de Bulsan
Sciche al é vegnù scrit tl foliet ladin dl 8 de november 2019 dal redatour Iaco Rigo déssel tosc vegnì scrit fora per l'Aministrazion dla scola y cultura ladina n post de diretour de repartizion nuef. An spera che al vegne endò autonom sciche al é sté fin a dant valch ann; demé ilò podará l diretour mete en pratica sies idees y propostes concretes adum a cheles de siei colaboradours y aconsiadours. Na enciaria autonoma é plu respeteda, plu chirida, y garantesc n majer impegn, ala à plu fazion y comporta de miours resultac.
La Intendenta é ciarieda con se cruzié, adum a siei ispetours, di problems dla scola che ne mancia mai, dla integrazion, mess pu la scola se svilupé tres inant, cresce, se mioré, se modernisé y tegnì cont dles enrescides nueves sun l ciamp pedagogich, psicologich y cultural. La Intendenta à da se festidié dla formazion di ensegnanc, che al vegne tres docà personal scolastich cualifiché, sce an vuel mantegnì n bon livel dl ensegnament y che la scola sie na atrazion per i joegn y na istituzion de prestije per i Ladins.
Cherié plu posć publics tla Ladinia
Dutes les enciaries culturales toca da avei si ofize tla Ladinia per abiné plu saurì personal, per garantì l contat con la jent. La Ladinia à debujegn de cotant de persones che se dae ju a livel plu aut con la cultura ladina, cie che ti fajessa ence bon a la industria monoculturala dl turism. Perchel fòssel dret de sposté ence de autri posć ladins de laour da la zité tles valedes y cherié, dantaldut tl setour sozial, plu posć publics nuefs tla Ladinia!
Ence i autri posć prevedus per diretours de ofize dess ester curis tost acioche ai posse laoré y raprejenté sia jent te ciamps che é de gran importanza per la cultura y per i ladins en general. Chest se aoda i joegn che speta do n post per mete en pratica cie che ai à emparé y chest se aspeta ence les scoles, les lies culturales, duc i ladins che à a cuer la cultura ladina y l bon funzionament dla aministrazion. La creazion de na repartizion per la cultura ladina autonom fossa de gran aiut per che la cultura ladina floresce inant, cresce y se slerge fora tres deplù, daite y defora dla Ladinia. Speron ince che la man publica mostre les manies plü lerges y aumenteie i finanziamenc por podei garantì na majera ativité di media y dles lies culturales ladines.  (Lois Trebo, Badia)

Galaria retrac