Ai artejans artisć dl'Unika

Data

11 de dezember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Dan che fina via l ann ulëssi ti fé i cumplimënc ai cumëmbri dl'Unika de Gherdëina per la doi gran mostres/manifestazions fates cun gran mpëni y lëur ntan la sajon auta tl zënter de nosc luech de Urtijëi y tl zënter dal Tennis a Runcadic, ora Passua.
Manifestazions artistiches de livel aut de ert, che desmostra la mo gran vivanda che ie te chësta nosta tradizion tl'ert dl ziplé y dëpenjer, che va inant cun ardimënt, tulan su l spirt dl tëmp da śën zënza resté fërms. Na richëza, tl medemo tëmp, de cultura, che identifichea dassënn la jënt de nosta valeda, che à purtà y porta mo for lëur y bënsté a truepa nosta jënt, diretamentër y ndiretamënter. Na realtà chësta, che nëus jënt de Gherdëina pudon avëi gran legrëza limpea.
Lëures senzieres, realisei defin cun gran mpëni, cun cë, cun cuer y cun la mans, zënza se judé ora cun mesuns de mascins y computers che va tan de moda nce tlo da nëus, y che ie purtruep belau deventei la norma dl'ert ufiziela, dl marcià y dla galaries d'ert d'al didancuei.
A chisc artejans/artisć ti sentions bonamënter duc de gra, ajache cieche ëi fej y mët uni doi ani mpe, a na tarifa de cosć scialdi bassa (per talian: »al prezzo di costo«) ne n'iel bonamënter te dut l raion dla Elpes nia mo n iede.
L ie mé da speré che i ebe, deberieda cun l presidënt Christian Stl Holzknecht, la forza, l'artenienza y l sustëni da ulache l sustëni toca da unì, per jì inant de chësc viers nce ti proscimi ani.  (Herbert Prinoth, Urtijëi)

Galaria retrac